Kryeministri Edi Rama në rubrikën e tij “Sy m’sy” teksa u përgjigjej komenteve të ndjekësve foli në lidhje me zgjedhjet e 11 majit. Rama u shpreh se vota e 11 majit ka peshë gjeopolitike teksa e lidhi procesin zgjedhor me integrimin e vendit tonë në BE.
Ai theksoi se dritarja e hapur për t’u integruar në BE duhet të mbyllet sipas planit të paraqitur, brenda 2027-ës. Rama shtoi se ky moment duhet të shfrytëzohet duke punuar çdo ditë që misioni të kryhet me sukses brenda afatit.
“Për herë të parë në 11 maj vota ka peshë gjeopolitike. Në një kohë kur bota po lëkundet. Ne na duhet bashkim, lidership dhe qëndrueshmëri. Kjo dritare e hapur, ku janë përputhur dëshirat tona me të BE, mund të mbyllet dhe të kthehemi aty ku ishim.
Ky është momenti. Prandaj kemi kalendarin më ambicioz në historinë e integrimit, pra të mbyllim procesin e integrimit brenda 2027. Çdo javë ministrat e shtetit japin hesap para BE për ecurinë. Mali i Zi ka vite që po bën punën që ne e kemi nisur vjet. Nuk është një derë, është një dritare që nuk duhet humbur,” tha Rama.
