Sot është 8 Marsi, Dita Ndërkombëtare e Gruas. Presidenti i Republikës, Bajram Begaj, uroi sot të gjitha gratë shqiptare me rastin e 8 Marsit, duke i cilësuar ato forcën e vërtetë të jetës së shoqërisë sonë. “Bekuar qofshin gratë shqiptare, forca e vërtetë e jetës sonë!”- shkroi Presidenti i Republikës.
Prej më shumë se 1 shekulli, gratë në mbarë botën festojnë Ditën Ndërkombëtare të Gruas më 8 Mars. Por si nisi Dita Ndërkombëtare e Gruas?
Dita Ndërkombëtare e Gruas u rrit nga lëvizja e punës. Kjo ditë i ka fillesat në vitin 1908, kur 15 000 gra marshuan nëpër qytetin e Nju Jorkut duke kërkuar orë më të shkurtra pune, paga më të mira dhe të drejtën e votës.
Një vit më vonë, Partia Socialiste e Amerikës shpalli Ditën e parë Kombëtare të Gruas. Ideja për ta bërë atë një ngjarje ndërkombëtare erdhi nga Clara Zetkin, një aktiviste komuniste dhe avokate për të drejtat e grave.
Në vitin 1910, ajo e ngriti atë në një Konferencë Ndërkombëtare të Grave Punëtore në Kopenhagen. Sugjerimi i aktivistes u mbështet nga 100 gra nga 17 vende që ishin në konfederatë.
Dita e parë Ndërkombëtare e Gruas u festua në vitin 1911, në Austri, Danimarkë, Gjermani dhe Zvicër. Kombet e Bashkuara filluan shënimin e ngjarjes në vitin 1975. Tema e parë e miratuar nga OKB-ja (në vitin 1996) ishte “Festimi i së kaluarës, planifikimi për të ardhmen”.
