Fiks Fare denoncoi mbrëmjen e së hënës një skandal në Doganën e Portit të Vlorës, ku përgjegjësi Renato Bega vepronte në sistem edhe kur ishte fizikisht jashtë territorit të Republikës së Shqipërisë.
Çuditërisht, në datat kur ka qenë jashtë, ai “figuron” në dokumente në Portin e Vlorës, duke nxjerrë nga territori i doganës kamionë me mallra. Janë mbi 2 mijë praktika doganore me këto veprime që ka konstatuar Fiksi se janë me probleme.
Në redaksinë e emisionit investigativ mbërritën informacione shoqëruar edhe me dokumente se Renato Bega ka bërë me dhjetëra udhëtime jashtë vendit, teksa ai “punonte” duke çliruar mallin në Portin e Vlorës. Emri i tij është në dhjetëra praktika të tilla.
Në lidhje me këtë rast, ka reaguar Drejtoria e Përgjithshme e Doganave, e cila bën me dije se ka nisur ecurinë disiplinore për Kryetarin e Degës Vlorë, Artan Bedini dhe pezullimin nga shërbimi civil të Përgjegjësit të turnit në Degën e Doganës Vlorë, Renato Bega. Si dhe nisjen e hetimit administrativ për problematikën e trajtuar nga emisioni Fiks Fare.
“Në përgjigje të kërkesës tuaj të datës 03.03.2025 me lëndë “Kërkesë për informacion” si dhe pas transmetimit të emisionit të mbrëmjes në Fiks Fare të po kësaj date, mbi Degën e Doganës Vlorë, Ju informojmë:
Pas transmetimit në emisionin tuaj investigativ të mbrëmjes të datës 03.03.2025, menjëherë brenda ditës së sotme 04.03.2025 u morën masat administrave:
Fillimin e ecurisë disiplinore për Z. Artan Bedini, Kryetar i Degës Doganës Vlorë
Pezullimin nga sherbimi civil të Z. Renato Bega, Përgjegjës turni në Degën e Doganës Vlorë
Nisjen e hetimit administrativ mbi problematikën e trajtuar nga emisioni “Fiks Fare” për Degën e Doganës Vlorë
Drejtoria e Përgjithshme e Doganave vlerëson maksimalisht komunikimin me mediat e shkruara dhe elektronike.
Duke Ju falenderuar per bashkepunimin
Kordinatori per te Drejten e Informimit – DPD”, njofton Drejtoria e Përgjithshme e Doganave
