ELBASAN – Tre nga pesë të plagosurit e aksidentit tragjik që ndodhi një ditë më parë në aksin Peqin-Elbasan janë nisur drejt Spitalit të Traumës për ndihmë të specializuar mjekësore. Pesë të plagosurit u dërguan fillimisht në spitalin e Elbasanit, por gjendja shëndetësore e tre prej tyre është përkeqësuar dhe janë nisur drejt Traumës këtë të hënë.
Aksidenti tragjik u regjistrua mëngjesin e së dielës (2 Mars) në aksin rrugor Peqin-Elbasan, në fshatin Paulesh. Një automjet tip “Benz” me drejtues Klodian Shahinin, është përplasur me një furgon pasagjerësh, i drejtuar nga Anesti Bufi.
Si pasojë e përplasjes humbi jetën shoferi i Benzit bashkë me nënën e tij (Fatbardha Shahini), ndërsa mbetën të plagosur shoferi i furgonit dhe 4 pasagjerë në mjet. Rrethanat e ngjarjen mbeten ende të paqarta, grupi hetimor po punon për zbardhjen e plotë të rastit.
