TIRANË- Seanca e sotme në GJKKO për ish-ministrin Ilir Beqaj dhe personat e tjerë në lidhje me dosjen e sterilizimit është shtyrë për një moment të dytë. Seanca e radhës mësohet se do të zhvillohet më 13 mars në orën 12:30. Shkak i shtyrjes së seancës ishte kërkesa e avokatit të Beqajt për aktin e shkruar nga ana e prokurorisë për rikualifikimin e akuzës.
Avokatit Ermal Yzeiraj nuk i është vënë në dispozicion vendimi per rikualifikimin e vepres penale. Ai u shpreh se nuk dinë qëndrimin e Prokurorit lidhur me ndryshimin e akuzës nga “shpërdorimi i detyrës” në akuzën “vjedhje duke shpërdoruar detyrën”.
“Ne nuk e dimë qëndrimin e Prokurorit lidhur me ndryshimin e akuzës nga shpërdorimi i detyrës në vjedhje duke shpërdoruar detyrën. Nga bashkëpunimi i thjeshtë në një formë më të lartë, ajo e grupit të strukturuar kriminal”, tha ai.
Avokati kërkoi pezullim të afateve të paraburgimit dhe të arrestit shtëpiak.
“Deri dje pyeta ata të administratës në Durrës, por më thanë s’ka ardhur, pse nuk e nisët. Në dukje kjo është kërkesë për marrje vendimi, por në fakt në thelb është për shtyrje. Ndaj, kërkoj pezullim të afateve të paraburgimit dhe të arrestit shtëpiak”, tha më tej avokati.
Ish-ministri, Ilir Beqaj është i pandehur për dosjen e koncesionit të sterilizimit, ndërsa më 18 mars iu komunikua edhe akuza shpërdorim detyre e kryer në bashkëpunim. Ndaj Beqajt rëndojnë akuzat “Shpërdorim detyre”, e kryer në bashkëpunim. Hetimi SPAK është kryer për koncesionin “shërbime të integruara për ofrimin e setit të personalizuar të instrumenteve kirurgjikale, furnizimin me material mjekësor steril njëpërdorimësh në sallat kirurgjikale, si dhe trajtimin e mbetjeve biologjike dhe dezinfektimin e sallave kirurgjikale”, në kohën kur Beqaj drejtonte ministrinë e Bujqësisë.
Për sterilizimin janë marrë të pandehur edhe 8 të tjerë, mes tyre ish-zv-ministri Klodian Rrjepaj dhe përfituesi i Koncesionit Ilir Rrapaj të dy në pranga që prej gushtit të vitit të kaluar. Në gjykim do të shkojnë edhe 6 ish-zyrtarë të Ministrisë së Shëndetësisë të cilët kanë qenë anëtarë të Komisionit të koncesionit të sterilizimit.
