TIRANË- Kryetari i Partisë Demokratike, Sali Berisha ka reaguar lidhur me takimin e kryeministrit Edi Rama me punonjësit e bashkisë së Tiranës në sheshin “Skënderbej”.
Berisha ka ndarë një foto të lajmërimit të takimit, ndërsa shkruan se “Vullnetarët e Edit” mblidhen me urdhër si në zboret e dikurshme të diktaturës.
“Shihni si i mbledh ‘Vullnetarët e Edit’, për hajdutin e Bashkisë, narko-kreu i qeverisë. Me urdhër si në zboret e dikurshme të diktaturës.”, shkruan Berisha.
foto e postuar nga berisha
Kryeministri Edi Rama do të zhvillojë pasditen e sotme një takim me punonjësit e Bashkisë së Tiranës në orën 16:30 në “Sheshin Skënderbej”. Takimi pritet të zgjasë një orë, për tu pasuar më pas nga një tjetër takim në orën 17:30 me këshilltarët e majtë të kësaj Bashkie.
Takimet e kreut të qeverisë vijnë pas arrestimit të kryebashkiakut të Tiranës, Erion Veliaj i cili akuzohet nga Prokuroria e Posaçme për korrupsion, pastrim parash, dhe abuzime me fondet publike, së bashku me bashkëshorten e tij Ajola Xoxa si dhe 6 biznesmenë të tjerë. Kryebashkiaku Veliaj ndodhet në burgun e Durrësit, pasi GJKKO la në fuqi masën “arrest me burg” ndaj tij, ndërsa bashkëshortja e tij, Xoxa është lënë në “detyrim paraqitje” bashkë me 6 biznesmenët e tjerë.
