Kryedemokrati Sali Berisha ka akuzuar kryeministrin Edi Rama se ka paguar para në New York Times kundër tij.
Komentet Berisha i bëri përmes një deklarate për mediat, ku tha se kjo gjë Ramës iu kthye në bumerang, pasi sipas tij, strategu i fushatës së Presidentit Donald Trump (tashmë i kontraktuar nga PD), deklaroi për New York Times se në Shqipëri ka shkuar për të vijuar punën e Trump për ta bërë Shqipërinë të madhe përsëri.
Ish-kryeministri tha gjithashtu se LaCivita deklaroi për të përditshmen amerikane se Edi Rama është thjesht një kukull e Xhorxh Sorosit dhe se akuzat ndaj Sali Berishës janë mirëfilltas politike.
Pjesë nga fjala e Berishës:
Edi Rama sot është njeriu më i damkosur. Është kryeministri më i damkosur në Europë si kukull e Xhorxh Sorosit.
Dy ditë më parë ai pagoi, vetë apo nëpërmjet të tjerëve, 150 mijë a sa mund të ketë kushtuar ajo hapësira në Nju Jork Tajms kundër meje.
Iu kthye në bumerang. Se dje, njëri nga dy kryestrategët e rikthimit më madhështor, më të jashtëzakonshëm në histori, rikthimit të Donald Trump, i deklaronte Nju Jork Tajmsit se në Shqipëri kam shkuar të vazhdoj punën e Donald Trump për të bërë Shqipërinë të madhe përsëri. Dhe se, Edi Rama është thjesht një kukull e Xhorxh Sorosit dhe se akuzat ndaj Sali Berishës janë mirëfilltas politike.
Karma është ashtu siç e do ai vetë.
Se një ditë para, artikull i sponsorizuar thoshte. Ky tjetri nuk ishte artikull i sponsorizuar, ky tjetri ishte artikulli i të vërtetave dhe i doli.
