Detaje të tjera janë zbardhur në lidhje me vdekjen tragjike të 12-vjeçares në spitalin e Durrësit. Vajza ka shkuar në shkollë si çdo ditë, por gjatë orës së dytë të mësimit ka përjetuar dridhje të ngjashme me ato të epilepsisë.
Mësuesit kanë reaguar menjëherë dhe e kanë dërguar vajzën në Qendrën Shëndetësore të Sukthit, ku ka marrë ndihmën e parë dhe janë njoftuar prindërit e saj. Ata e kanë çuar në Spitalin e Durrësit, ku është stabilizuar fillimisht, por më pas ka pasur dridhje të të gjithë trupit.
Pas dy orësh, vajza është dërguar urgjentisht për një skaner, ku është zbuluar se kishte një hemorragji në tru. Mjekët kanë ndërhyrë menjëherë, duke realizuar intubimin, por hemorragjia ka vazhduar, çka ka çuar në vdekjen e saj pas rreth tre orësh, rreth mesditës.
Policia ka nisur hetimet dhe ka marrë mjekët në pyetje. Gjyshërit e vajzës ishin pranë saj në spital dhe janë shoqëruar me të gjatë gjithë kohës. Sipas kartelës mjekësore, vajza ka pasur gjakderdhje të vazhdueshme në kokë. Tashmë do t’i nënshtrohet një ekspertize mjeko-ligjore për të përcaktuar shkakun e vdekjes. Materialet i janë kaluar prokurorisë së Durrësit për hetim të mëtejshëm.
