WASHINGTON- Presidentja e Kosovës, Vjosa Osmani gjatë qëndrimit në Washington ka bërë të ditur se është takuar me kryetarin e Komisionit të Punëve të Jashtme në Dhomën e Përfaqësuesve. Përmes një postimi në Facebook Osmani shkruan se Kosova dhe SHBA-ja kanë një lidhje historike, një aleancë e ndërtuar mbi vlera të përbashkëta dhe përkushtim për paqe e siguri.
“Dje në takim me Brian Mast, Kryetar i Komisionit për Punë të Jashtme në Dhomën e Përfaqësuesve të SHBA-së, diskutuam për lidhjen historike të Kosovës me Shtetet e Bashkuara një aleancë e ndërtuar mbi vlera të përbashkëta dhe përkushtim për paqe e siguri. Me administratën e Presidentit Trump, synojmë thellimin e bashkëpunimit në fusha të ndryshme, përfshirë mbrojtjen, investimet strategjike dhe vazhdimin e punës së përbashkët për forcimin e pozitës ndërkombëtare të Kosovës. Mbështetja amerikane ka qenë dhe mbetet jetike për shtetin tonë”, shkruan ajo.
