Nga Almer Toska/ Gazetar dhe drejtues i portalit Timoni.al
Dje, Enkelejd Alibeaj reagoi ndaj deklaratave të mia në News 24, ku theksova se partia e tij është e financuar nga dy biznesmenë të PS. Ai tha se, nëse kam fakte, duhet t’i dërgoj në SPAK për hetime të mundshme. Mirëpo, ajo që Enkelejdi harroi të përmendte është se në vitin 2021, kur nisi lufta e brendshme në PD, ai zgjodhi të mbështeste Lulzim Bashën, ndërsa shumica e demokratëve u rreshtuan pas Sali Berishës. Ai e vuri interesin personal mbi interesat e demokratëve dhe të qytetarëve të Fierit, duke u distancuar nga ata dhe duke iu bashkuar një grupimi të ngushtë që e përdori PD-në për përfitime të tij.
Pasi demokratët morën vulën dhe selinë e Partisë Demokratike, Enkelejdi e tradhtoi Bashën dhe krijoi partinë e tij të re, duke zgjedhur përsëri interesin e tij personal dhe jo atë të demokratëve. Ky është një akt i papërgjegjshëm dhe i pasinqertë ndaj gjithë atyre që kanë dhënë jetën dhe mundin për të mbajtur lartë idealet e Partisë Demokratike.
Në një kohë kur demokratët e Fierit janë përballur me persekutime nga pushteti, kërcënime dhe varfëri, Enkelejdi zgjodhi të largohej nga ata dhe të krijonte një parti të re, vetëm për të shërbyer interesave të tij të ngushta. Ky njeri ka tradhtuar çdo princip dhe interes të demokratëve, dhe asnjëherë nuk i ka kërkuar falje për lëvizjet politike që ka bërë, pa marrë parasysh pasojat që ato kishin për të tjerët.
Enkelejd, në vend që të merresh me përpjekjet për t’u ndihmuar qytetarëve dhe demokratëve, ti vazhdon të gabosh sepse për ty më i rëndësishëm “xhepi yt” jo dhe fati i atyre që të kanë votuar për shumë vite. Populli është ai që do të gjykojë se kush ka qëndruar besnik dhe kush ka tradhtuar idealet e tij.
Por tani kam disa pyetje publike për ty, Enkelejd:
- A e ke krijuar partinë me bekimin e Henri Cilit?
- A ke ti ndonjë marrëdhënie apo takohesh me deputetët biznesmenë të PS, Laert Duraj dhe Vullnet Sinaj?
- A financohet partia jote nga këta dy individë?
Këto janë pyetje që kërkojnë përgjigje të qarta dhe transparente, për të mos lënë më dyshime për atë që qëndron pas gjithë këtij procesi politik të paqartë. Nuk mund të flasim për drejtësi dhe etikë politike, kur veprimet janë të mbushura me paqartësi dhe interesa të fshehura.
Enkelejd, dua të të kujtoj diçka: unë jam po ai Almer që ti ke njohur para 10 vitesh, kur luftonim për demokratët dhe për të sjellë PD-në në pushtet. Por jeta na sprovon për të vënë në pah karakterin tonë. Kur erdhi radha që unë të merrja mandatin e deputetit, unë zgjodha demokratët para interesit tim personal. Nëse do të kisha zgjedhur të futesha në parlament në vitin 2019, ti do më kishe përjashtuar nga PD dhe do më kishe quajtur tradhtar, sikurse bëre me Muslim Murrizin, duke e anatemuar si të tillë. Sot, Muslimi është rikthyer në PD, ndërsa ti, Enkelejd, nuk je më aty.
Në ndryshim nga ti, unë besoj tek vlera dhe besnikëria ndaj asaj që besoj. Kam refuzuar shumë oferta ekonomike nga pushteti, sepse jam një njeri i ndershëm dhe besnik ndaj atyre që më mbështesin. E di mirë se si ti ke zgjedhur rrugën tënde për interesat e tua personale. Ti krijove një parti të re, dhe askush nuk të tha “tradhtar”. Po, ky është ndryshimi që na ndan.
Në Roskovec, ku punuam së bashku, kemi arritur rezultate të jashtëzakonshme. Ky sukses të dha ty kredite politike brenda PD-së dhe jashtë saj. Por Enkelejd kur ty të sprovoi koha, ti zgjodhe interesin personal mbi interesin e demokratëve. Ky është një tjetër moment ku ne nuk e ndjekim të njëjtën rrugë. Koha tregoi që Ti, “për dy lek”, të lë në rrugë, ndërsa unë vazhdoj të luftoj me ndershmëri dhe pa asnjë kompromis për ata që më besojnë dhe më mbështesin.
Demokratët meritojnë një forcë politike që t’i përfaqësojë në mënyrë të pastër dhe të ndershme. Ata meritojnë besnikëri, jo njerëz që lëvizin për interesa të ngushta dhe personale. Le të bëjmë një hap të qartë përpara, dhe jo të vazhdojmë të mbajmë një rrugë të mjegullt, ku tradhtitë politike dhe mbështetja për pushtetin e korruptuar janë kryesorja.
Shiko video👇👇👇👇
