Përfaqësuesit e opozitës shqiptare, Fatmir Mediu dhe Albana Vokshi, po ndjekin nga afër procesin zgjedhor në SHBA. Ata vizituan Qendrën e Regjistrimit të Votuesve dhe të votave me postë në Orange County, Kaliforni, ku morën pjesë në çdo fazë të procesit zgjedhor, duke përfshirë mbledhjen e kutive të votimit, verifikimin e firmave të votuesve dhe numërimin e votave.
Në ditën e tretë të vizitës së tyre, Mediu dhe Vokshi patën mundësinë të diskutonin me figura të njohura të politikës në Kaliforni, përfshirë kryetarin e Bashkisë së Huntington Beach, Tony Strickland, i cili shpjegoi përplasjen ligjore mbi kërkesat e identifikimit të votuesve, dhe senatori Ted Gaines, i cili dha një pasqyrë të klimës politike të shtetit.
Nënkryetarja e Partisë Republikane të Kalifornisë, Corrin Rankin, ndau mendimet e saj për të ardhmen e partisë në shtetin e “Golden State”, ndërsa Alex Tarascio, një ekspert i sondazheve, ofroi informacion të detajuar mbi rezultatet e sondazheve kombëtare dhe shtetet e pavendosura.
