ITALI– Dhimbja për një fëmijë që nuk është më duket se nuk do të shteret kurrë nga zemra e këngëtares dhe aktores italo-amerikane Romina Power. Edhe sot ajo ka publikuar disa foto me të bijën, duke shkruar: Ku je, dashuria ime?
Ylenia Carrisi, vajza e çiftit më të famshëm italian, Romina dhe Albano Carrisi u zhduk në mënyrë misterioze në Shtetet e Bashkuara në 1994 dhe u deklarua e vdekur, por nëna e saj kurrë nuk e pranoi këtë. Ndryshe nga ajo, këngëtari italian Al Bano, ka thënë më herët se është i bindur që vajza e tij ishte e vdekur. Edhe në një intervistë të dhënë për 80-vjetorin e tij e përmendi sërish të bijën, duke shtuar edhe njëherë se ai e di që ajo nuk jeton më…por edhe se këtë fakt, Romina nuk do ta pranojë kurrë.
“Ajo ishte një vajzë e jashtëzakonshme. Ajo studionte në King’s College në Londër. Ajo fliste anglisht, spanjisht, frëngjisht, portugalisht. Ajo erdhi në Moskë me ne dhe mësoi pak rusisht, në mbrëmje unë dhe Romina shkuam të flinim dhe ajo zbriti në Sheshin e Kuq për të parë ndryshimin e rojeve në mauzoleun e Leninit. Më pas, na shoqëroi në SHBA, për të xhiruar një film dokumentar. Natën e Vitit të Ri 1994 ajo u zhduk. E pyeta personin e fundit që e pa, e më tha se ajo ishte ulur buzë lumit, ai e paralajmëroi: nuk mund të rrish këtu! Por Ylenia nuk u largua. Kur ai këmbënguli, ajo i tha atij “unë i përkas ujërave” dhe u zhyt në lumë, duke notuar me ritëm. Aty kuptova që ai thoshte të vërtetën, sepse Ylenia e thoshte atë fjali si fëmijë para se të zhytej. Por lumi Misisipi nuk fal kurrë. Romina nuk ka dashur ta pranojë kurrë vjekjen e saj,”-tha Al Bano.
AL BANO DHE YLENIA
Çifti kurorëzoi dashurinë në martesë në korrik të 1970-ës. Të dy të rinj, por mjaft të dashuruar për të hedhur hapa të mëtejshëm. Bashkë kanë katër fëmijë. Por pas vdekjes së vajzës së tyre të madhe në 1993-shin, çifti u nda në 1999.
Ylenia u shfaq me ta në filmin “Champagne in paradiso” kur ishte 13 vjeçe. Dëshira e saj ishte të bëhej shkrimtare, ndaj studioi në Londër.
Edhe pse planifikonte që të vazhdonte studimet, por vendosi të kthehej në Itali dhe të shiste gjërat e saj për të financuar një udhëtim nëpër botë. Plani i saj ishte të shkonte në Amerikën e Jugut, ku vëllai i saj Yari e vizitoi atë më 26 dhjetor 1993. Megjithatë, ai zbuloi se ajo ishte larguar nga New Orleans për në Meksikë një ditë më parë, pa njoftuar askënd.
Zhdukja e saj nuk është zbardhur, ndonëse Policia ka tentuar të gjejë gjurmët e saj pa sukses. U përfol se një dëshmitar pa një vajzë që përputhej me përshkrimin e Ylenia-s, të hidhej në lumin Misisipi dhe të bërtiste: Unë i përkas ujit!. Roja Bregdetare nisi një kërkim, por pa sukses.
Në vitin 2013, Al Bano deklaroi zyrtarisht vdekjen e vajzës së tij, por ish-bashkëshortja e tij Romina nuk u pajtua kurrë me këtë fakt. Ajo u kthye në Amerikë duke besuar se Ylenia ishte ende gjallë. Romina Power nuk ka ndalur kurrë të shpresojë që një ditë Ylenia të kthehej në shtëpi dhe për këtë ajo filloi apele të shumta përmes rrjeteve sociale. Por i ati duket se e ka pranuar fatin e tij.
Në një intervistë për “Chi”, në vitin 2018, këngëtari është shprehur se të bijën do ta takojë vetëm në parajsë: Si baba kuptova që kishte ndodhur një dramë. Ylenia thoshte gjithmonë ‘unë u përkas ujërave’, dhe në ujëra u kthye.
