SHKODËR– Asgjë nuk është e konfirmuar ende, por ka dyshime të forta se bashkë me Hamza Licin dhe Arlind Bushatin në mjet me ta ka qenë edhe një person tjetër. Kjo edhe për faktin se në mjet janë gjetur 3 armë zjarri, tip pistoletë, çka lë vend për dyshime se viktimat nuk kanë qenë vetëm. Një tjetër detaj është fakti që si Lici, ashtu edhe Bushati ishin nxjerrë nga makina pas atentatit. Është e pamundur që të jetë Bushati personi që ka dalë vetë dhe ka nxjerrë edhe shokun, për shkak se kishte marrë një plumb në kokë, i cili i kushtoi edhe jetën.
Ky person i tretë mund të jetë larguar menjëherë pas atentatit, por nuk dihet nëse ka mbetur i lënduar ose jo, megjithatë grupi hetimor ka marrë mostra gjaku brenda mjetit dhe do të konfirmohet nëse i përkasin edhe një personi të tretë apo vetëm dy viktimave Lici e Bushati.
Pasditen e djeshme, 4 persona kanë komplotuar dhe realizuar vrasjen e Hamza Licit, vëllait të Ibrahim Licit. I riu, vetëm 23 vjeç ndërroi vend menjëherë nga plumbat e marrë, ndërsa shoku i tij, Arlind Bushati ndërroi jetë disa orë më vonë në spital. Djali i ish-kandidatit të Partisë Demokratike për Bashkinë e Shkodrës kishte marrë një plumb në kokë. Kjo masakër i kushtoi jetën edhe një kalimtareje të rastit, Flutura Bashës. Kjo e fundit po shkonte në shtëpi me të shoqin, kur motoçikleta e tyre u përplas nga “Benzi” i Licit që kishte humbur jetën në timon. Flutura ndërroi jetë në vend, ndërsa Bashkim Basha ndodhet në spital në gjendje të rëndë. Tashmë ka nisur aksioni për kapjen e autorëve, por deri më tani pas ka mbetur vetëm makina e tyre e djegur.
