VLORË- Një video që qarkullon së fundmi në rrjet e nëkryetares së bashkisë së Vlorës, Irena Toshkallari, ka ndezur polemika për shkak dhe të kohës kur videoja është bërë. Nënkryetarja e bashkisë shihet duke festuar në klubet e Kinës me këngë shqiptare, ndërkohë që banorët e qytetit bregdetar përballenin me përmbytjet e 4 tetorit dhe përpiqenin të shpëtonin, çfarë kishte mbetur nga shiu dhe balta. Toshkallari shihet duke vallëzuar me një vajzë tjetër në një klub me muzikë shqip.
Për 24 orë, reshjet e shiut sollën pasoja të rënda edhe ditët më pas ku qindra banesa dhe biznese u përmbytën, duke shkaktuar edhe dëme të shumta materiale dhe financiare. Po ashtu mbrëmjen e 4 tetorit 33 familje u evakuuan dhe kaluan natën në konviktet e qytetit. Kontrolli i Lartë i Shtetit nisi më 7 tetor një auditim pas përmbytjeve masive, ku objekt i këtij kontrolli janë disa institucione, ku do të auditohet me prioritet për shkaqet që çuan në këtë situatë problematike. Pritet që pjesë e këtij auditimi të jenë institucionet e pushtetit lokal si dhe ato qendror, si për shkaqet që çuan në përmbytjet po ashtu edhe për menaxhimin e situatës nga institucionet përkatëse.
