Pas Ilir Metës edhe Monika Kryemadhi u fut në Gjykatën e Posaçme. Ajo po ashtu si Meta akuzohet për 3 vepra penale nga SPAK, korrupsion, pastrim parash dhe fshehje të pasurisë.
“Po shkoj për t’u paraqitur përballë një sistemi drejtësie të kastruar, nëse inteligjencën nuk e kanë aq të zhvilluar sa të kuptojnë fjalën kastruar për të treguar dhe për të kërkuar kush e ka shpërndarë dosjen në media që kanë nxjerrë sekretin hetimor. Për të kuptuar që drejtësia e Ramës nuk është drejtësia që ka kërkuar Shqipëria dhe kanë harxhuar partnerët por është drejtësia e propagandës së Ramës. Të shikojmë nëse do ta përballojnë dot apo jo” tha Kryemadhi.
Ilir Meta u arrestua të hënën në hyrje të Tiranës nga forcat operacionale, aksion i cili u shoqërua me debate për mënyrën se si u krye ekzekutimi i urdhrit të Gjykatës.
Partia e Lirisë dhe opozita pretendojnë se ai u rrëmbye dhe se prej dy ditësh kanë ngritur akuza në drejtim të mazhorancës dhe institucioneve të rendit.
Pjesë e kësaj dosje është edhe Monika Kryemadhi, Pirro Xhixho dhe Ema Çoku për të cilët gjykata ka dhënë masa më të lehta sigurie.
