Kryeministri Edi Rama do të zhvillojë një tjetër takim me emigrantët shqiptarë në Selanik, Greqi më 3 nëntor.
Burime për gazetarin e Vizion Plus, Ermal Qori bëjnë me dije se takimi do të mbahet në orën 11:00 në ambientet e Porto Palace Hotel, ku pritet të marrin pjesë emigrantë shqiptarë që jetojnë dhe punojnë në këtë shtet.
Ky aktivitet është pjesë e përpjekjeve të qeverisë për të forcuar lidhjet me diasporën shqiptare dhe për të diskutuar çështje që prekin emigrantët, duke përfshirë integrimin dhe të drejtat e tyre në vendin pritës.
Vizita e Ramës në Greqi konsiderohet një hap i rëndësishëm për të adresuar sfidat dhe nevojat e komunitetit shqiptar atje.
Kujtojmë se kjo është hera e dytë që Rama takon emigrantët në Greqi. Vizita e tij e fundit ishte më 12 maj në Athinë.
