Kryetari i grupit të PD-së, Gazment Bardhi depozitoi dokumente në SPAK që sipas tij vërtetojnë se me shitblerjen e energjisë jashtë burse Belinda Balluku ka shkaktuar dëme miliona euro, që në një vit sipas demokratit arrijnë në 180 milionë euro në vit. Bardhi sqaroi sipas tij edhe skemën abuzive me në krye Ballukun, rivalen e tij në qarkun e Fierit në zgjedhjet e ardhshme.
“Jam këtu për të denoncuar publikisht dhe më pas për t’i kërkuar SPAK-ut hetimin e një prej skemave më korruptive të kësaj qeverie, shitblerjen e energjisë që vetëm për një vit abuzimi llogaritet në 180 milionë Euro. Përgjegjësja kryesore për këtë skemë korurptive që kalon miliona Euro në llogarinë e katër apo kompanive është Belinda Ballukut.
Në informacionin që PD i ka vendosur në dispozicion SPAK-ut tregohet e gjithë veprimtaria, veprimtaria e Belinda Ballukut që ka lejuar që energjia të shitet me humbje jashtë tregut të bursës. KESH duhet ta kontraktonte në bursë, e ka blerë shtrenjtë dhe e ka shitur lirë tek kompanitë sekserë. Vetëm për një javë në procedurën për blerjen e energjisë 24-30 qershor abuzimi shkon 1 milion euro” tha ai.
