Teksa turmat ishin mbledhur për të mbajtur zi për disa nga ata që u vranë në valën e sulmeve me bombë të së martës , një tjetër shpërthim ndezi kaos në Dahiyeh, bastioni i Hezbollahut në Bejrutin jugor.
Një video kapi shpërthimin, duke treguar një burrë të shtrirë në tokë dhe njerëzit e panikosur, disa duke bërtitur, duke vrapuar drejt vendeve të sigurta.
E gjithë kjo, pak momente para se të fillonin funeralet për një djalë 11-vjeçar dhe tre anëtarë të Hezbollahut të vrarë një ditë më parë.
Ndërsa lajmet u përhapën se kjo ishte pjesë e një valë e dytë shpërthimesh që tanimë po zhvillohen me telekomandë, paniku u rrit akoma më shumë, teksa asnjë qytetar nuk konsideron të sigurt asnjë pajisje elektronike.
Mbështetësit e Hezbollahut ndaluan disa herë edhe gazetarët apo operatorë, duke kërkuar që të mos përdornim telefonat apo kamerën me frikën se mund të hidheshin në erë.
Zyrtarët libanezë thanë se të paktën 20 njerëz u vranë dhe 450 të tjerë u plagosën në të gjithë vendin, me zjarre që thuhet se kanë shpërthyer në dhjetëra shtëpi, dyqane dhe automjete.
Tashmë, sulmet e fundit po shihen si një tjetër poshtërim për grupin e mbështetur nga Irani dhe një tregues i mundshëm se i gjithë rrjeti i tij i komunikimit mund të jetë infiltruar nga Izraeli.
