Kryeministri Edi Rama ka marrë pjesë ditën e sotme në hapjen e një konkursi ndërkombëtar, ku 10 studio arkitekturore do të paraqesin idetë për 4 projekte te reja, që do të shërbejnë për zyrat e reja të administratës shtetërore.
Gjatë deklaratës së tij, Rama njoftoi ngritjen e një kompleksi qeveritar, teksa sipas kreut të qeverisë, disa nga godinat aktuale të institucioneve kërkojnë kosto të mëdha mirëmbajtjeje dhe miliona euro qira vjetore.
Rama deklaroi se disa prej godinave, ku me shumë mundësi iu referua godinave të ministrive në qendër të Tiranës, nuk ofrojnë ambiente të përshtatshme për ambiciet e tyre, pasi janë të vjetra.
Ndërkohë, Rama tha më tej se paguan miliona euro qira vjetore për godinat e institucioneve shtetërore, ku u duk si një justifikim absurd, pasi godinat e ministrive janë prona shtetëtore, ndërkohë që paguan për pika të tjera të shpërndara në të gjithë Shqipërinë për shërbimet ndaj qytetarëve, siç janë pikat e Postës, por ato nuk ka se si t’i mbledhë në një godinë të vetme.
Ky projekt i ri i qeverisë duket se do të marrë nga buxheti i shtetit qindra miliona euro, ndërkohë që nuk dihet se çfarë do të bëhet me godinat që janë aktualisht në funksion të administratës shtetërore.
Me shumë mundësi, godinat e ministrive të cilat ndodhen në qendër, do të shemben për t’u kthyer në kulla, duke iu referuar edhe deklaratës së kryeministrit pak kohë më parë se do të shtojë kullat në kryeqytet.
“Janë 10 finalistë të ndarë në 2 grupe, 5 për çdo grup, që përballë jurisë ndërkombëtare do të prezantojnë projekt idetë e tyre lidhur me 4 zhvillime të rëndësishme, të cilat janë 4 zhvillime që i hapin rrugë një faze të re, një qasje të re dhe pa diskutim edhe një roli të ri të shtetit në raport me pronën publike.
Aktualisht sot për ta bërë të qartë për të gjithë ata që nuk janë të informuar në brendësi lidhur me këtë nisëm, institucionet publike paguajnë disa miliona euro në vit qera, për të ushtruar aktivitetin e tyre në mjedise që janë larg së qeni të denja për ambicien tonë të Shqipërisë 2030, janë larg së qenit të denja për atë çka meritojnë qytetarët të cilët shërbehen nga këto institucione, janë larg së qenit të denja për kushtet në të cilat në fakt duhet të punojnë shërbëtorët e shtetit. E përveçse janë miliona e miliona euro që shkojnë çdo vit për qera, janë një sërë institucionesh që vazhdojnë të ushtrojnë aktivitetin e tyre në godinat të cilat nuk kanë asnjë lloj vlere të asnjë natyre. Jo vetëm që nuk kanë asnjë vlerë arkitektonike, por paraqesin edhe probleme te vazhdueshme mirëmbajtje si rezultat i të qenit godina të vjetra të trashëguara nga periudha komuniste dhe njëkohësisht të përdorura për qëllime të reja që nuk përshtaten fare me ato mjedise.
Faktikisht sot arkitektet janë thirrur të në ofrojnë idetë dhe projektet e tyre për të na dhënë mundësinë të ndërtojmë një kompleks të madh qeveritar, i cili do të akomodojë një numër të konsiderueshëm institucionesh dhe nga ana tjetër edhe një tjetër godinë publike ku do të akomodohen të tjera institucione që janë sot në nevojë të madhe për të pasur një vend të denjë për të gjitha kërkesat e tyre. Faktikisht ajo që do të ndodhë falë agjencisë në fjalë, pra Korporatës Shqiptare të Investimeve është që shteti nuk do të dorëzojë më prona ashtu siç i ka dorëzuar në të shkuarën tek privatët, por do të futet në një rol po aq aktiv si përfaqësues i pronës së vet përmes AIC për të nxjerrë nga shfrytëzimi i pronave publike, të mira publike dhe natyrisht edhe për të nxjerrë përfitime financiare për vetë shtetin që do të shërbejnë për investime të mëtejshme.
Shteti vendos në dispozicion pronat publike dhe më pas fton në konkurs investitorë vendas e të huaj për ndërtimin e projekteve, nga ku shteti do të përfitojë si pronar i truallit një infrastrukturë të re për institucione publike që ende rrinë në mjedise me qira apo ende nuk e kanë selinë e tyre të shekullit të ri, si për shembull Biblioteka Kombëtare.”, – tha Rama.
Studiot pjesëmarrëse në konkurs:
ANDREA CAPUTO (Itali) dhe SO-IL (USA)
COLDEFY (Francë)
EMBT Architects (Spanjë)
SNOHETTA (Norvegji)
ZAHA HADID Architects (UK)
ARCHI-TECTONICS (USA)
ARCHITECTURE STUDIO (Francë)
BAUKUH (Itali)
COOK RESEARCH (Angli)
MAD Office (SHBA)
