Gjatë mbledhjes së Komisionit të Ligjeve, janë shfaqur tensione të forta mes deputetëve. Deputetja e Partisë Demokratike, Dhurata Çupi, ka ngritur shqetësime për procedurat e kalimit të ligjeve, duke kërkuar shkurtimin e rendit të ditës.
Ajo ka kritikuar mënyrën e kalimit të ligjeve, duke theksuar se është e turpshme që ligjet të rikthehen nga Gjykata Kushtetuese si anti-Kushtetuese.
“Duhet të jemi të përgjegjshëm. Kemi aktin normativ për buxhetin dhe ligje të rëndësishme. Nuk mund të kalojmë ligje në këtë mënyrë, që më pas të na i rrëzojë Gjykata Kushtetuese,” ka thënë Çupi, duke i kërkuar kryetares së komisionit, Klotilda Bushka, të marrë masa për të shmangur një situatë të tillë.
Në përgjigje, Bushka ka kritikuar mënyrën se si Çupi po përpiqet të ndikojë në punën e komisionit. “Nuk e di si jeni mësuar ju, por nuk mund të uzurponi komisionin,” ka deklaruar Bushka, duke theksuar se procedurat e komisionit duhet të respektohen dhe të ndiqen në përputhje me rregullat e miratuara.
