Në dosjen e korrupsionit që njihet edhe si dosja “5 D”, Prokuroria e Posaçme (SPAK) ka zbuluar tendera që kanë favorizuar kompaninë, jo vetëm në institucionet që drejtoheshin nga Redi Molla dhe Mariglen Qato.
Në dokument thuhet se ka dhe disa procedura ku autoriteti që ka nënshkruar janë kryetari i Bashkisë së Tiranës, por dhe zëvendëskryetari.
Kështu, në dokument thuhet se hetimi është shtrirë edhe mbi procedurat e prokurimit të zhvilluara nga autoriteti kontraktor Bashkia Tiranë dhe institucionet e tjera në varësi të saj, në të cilat është shpallur fitues shoqëria “5D konstruksion shpk”, si pjesë e bashkimit të operatorëve konkurrues.
Ndërsa argumentohet se nga dokumentacioni i sekuestruar, ka rezultuar se shoqëria “5 D konstruksion” është shpallur fituese në disa procedura prokurimi të zhvilluara nga autoriteti kontraktor Bashkia Tiranë dhe nga institucione të tjera në varësi.
Nga verifikimi, prokurorët shprehen se në këto prokurime rezultojnë të dhëna mbi favorizimin e operatorit ekonomik “5D konstruksion” në raport me operatorët e tjerë ekonomikë pjesëmarrës në garë dhe në raport plotësimin e kushteve dhe kritereve të kualifikimit.
Më tej, në material thuhet se në disa prej këtyre, ushtruesi i funksioneve administrative të titullarit të autoritetit kontraktor është kryetari i Bashkisë, z.Erion Veliaj dhe në disa të tjera është Zëvendëskryetari i Bashkisë z.Arbian Mazniku.
Gjithashtu, në dosje SPAK ka zbardhur kriteret që nuk janë plotësuar nga “5 D”-ja, duke renditur të paktën 5 tendera, siç është tenderi i rreth-rrotullimit Mullet deri në fshatin Qeha, apo ndërtimi i pedonales dhe korsi biçikletash në Liqenin e Thatë./Oranews
