Ministri i Brendshëm, Ervin Hoxha, ka kryer një inspektim të vijës bregdetare nga Himara në Sarandë për të monitoruar zbatimin e masave të sigurisë detare gjatë sezonit turistik.
Gjatë vizitës, ai theksoi se siguria detare dhe mjedisore janë përparësi për Policinë e Shtetit, përveç detyrave të saj në sigurinë publike dhe rrugore. Hoxha deklaroi se Policia, në bashkëpunim me Agjencinë Kombëtare të Bregdetit dhe Agjencinë Kombëtare të Mjedisit, do të mbikëqyrë rreptësisht dhe do të ndëshkojë ata që ndotin plazhet apo mjediset përreth.
Ai vuri në dukje rëndësinë e ruajtjes së parametrave të sigurisë për të garantuar një sezon turistik të suksesshëm.
