Është shtyrë për ditën e nesërme seanca e jashtëzakonshme në Kuvend që pritej të zhvillohej sot në orën 18:00, ku do të votohej kryetarja e re e Kuvendit, Elisa Spiropali dhe do të kalonin dekretet e presidentit Bajram Begaj për ministrat e rinj të qeverisë Rama.
Deputetët e PS janë njoftuar në mbledhjen e grupit se seanca parlamentare do të shtyhet për nesër për shkak se presidenti Begaj ka “bllokuar” përkohësisht ndryshimet në qeveri. Emrat e rinj të propozuar nga Rama po kalon në “skanerin” e stafit të Bajram Begajt, një procedurë e zakonshme e Presidencës që kryehet gjithmonë kur ka ndryshime në kabinetin qeveritar.
Burime nga Presidenca bëjnë me dije se ndryshimet në qeveri janë në proces verifikimi nga Bajram Begaj, ndërsa kryeministri Rama u ka kërkuar deputetëve që të rrinë në gatishmëri për çdo orë kur mund të thirren.
Sapo të merret “OK” nga Bajram Begaj, Kuvendi do të miratojë me shumicë të thjeshtë 4 ndryshimet në kabinetin qeveritar por edhe emërimin e Spiropalit si kryeparlamentare.
