Arrestimi i Ilir Beqajt për abuzime me fondet e BE duket se është një kambanë alarmi dhe për ish-ministren e Bujqësisë Frida Krifca, pasi edhe asaj i ka dalë emri në një skemë të ngjashme.
Beqaj është në qeli për 500 mijë euro, ndërkohë që Frida Krifca ka shpërdoruar afro 33 mln euro të fondeve që jepte BE për bujqësinë. E kemi fjalën për aferën IPARD.
OLAF ka gjetur pa fund shkelje kur Krifca ishte në krye të AZHBR dhe ka dorëzuar një dosje shumë voluminoze në SPAK. Ndryshe nga Beqaj, Krifca ka një mal me telashe. Ka prova, dëshmi dhe fakte, teksa kemi të bëjmë me një abuzim shumë të madh.
Vetë BE e ka thënë disa herë se kërkon “kokën” e Krifcës, pasi ka ushtruar presion të madh për një hetim sa më të thellë. Sipas burimeve ata po ndjekin me kujdes hetimet përmes të dërguarve të tyre në Tiranë.
Në mars, drejtuesit të SPAK, Altin Dumani, i është dërguar një letër-kujtesë nga OLAF, lidhur me kallëzimin penal në fjalë. Tani topi është në portën e SPAK.
Pak ditë më parë OLAF nxori dhe një raport, ku hidhe dritë mbi aferën. Në raportin vjetor OLAF zbulon se gjatë hetimit u vu re se fermerët ishin të detyruar të ndanin një përqindje të madhe të grantit të tyre me kompaninë e konsulencës, e cila do të bënte ndërmjetësin me AZHBR. Gjithashtu në dokument thuhet se u gjetën dhe disa parregullsi të tjera gjatë fazës së dhënies së granteve dhe zbatimit të disa projekteve.
Parregullsitë e gjetura me fondet e Bashkimit Europian për bujqësinë në Shqipëri, përbëjnë një shumë prej 33 milionë eurosh, e cila është 2,5 herë me lartë se shuma prej 13 milionë eurosh që nuk është përdorur në mënyrë të rregullt nga 6 shtete të tjera në Ballkan të tilla si Turqia, Maqedonia e Veriut, Serbia, Mali i Zi, Bullgari dhe Rumania.
Shuma totale e parregullsive e gjetur në 7 shtete të Ballkanit është rreth 47 milionë euro, nga të cilat 71% i takojnë Shqipërisë dhe 13 mln euro, ose 29% në 6 vende te tjera.
Për shkak të parregullsive dhe skemave mashtruese BE ka bllokuar fondet e IPARD për Shqipërinë, duke i dhënë një goditje të lartë sektorit, i cili veç të tjerash vuan edhe nga mungesa e financimeve të brendshme.
