Sali Berisha dhe Ismail Kadare kanë komunikuar sot me ‘kode’, si dikur në diktaturë. Kryetari i opozitës, i burgosur politik në arrest shtëpie dhe Ismail Kadare, shkrimtari i madh që ka lënë sot për herë të fundit shtëpinë e tij në Tiranë drejt banesës së përjetshme kanë qenë protagonistë të zhvillimeve më të hershme drejt rrëzimit të diktaturës.
Nëpërmjet një kurore me lule Kryetari i PD Sali Berisha ka ‘marrë pjesë’ sot paradite në homazhet e zhvilluara në TKOB në nder të gjeniut të letrave shqipe.
Kurora është vendosur nga n/kryetari Luçiano Boçi dhe deputetja Albana Vokshi.
N/Kryetari Luçiano Boçi në “Librin e Kujtimeve” shkruan:
“Në emër të Kryetarit të Partisë Demokratike Sali Berisha shprehim pikëllimin e madh për humbjen e gjeniut, figurës së ndritur, i cili me veprën e tij tejshkoi kohën, theu normat dhe tabutë ideologjike të socrealizmit dhe i dha letërsisë shqiptare dhe shpirtit shqiptar përmasë botërore!
I paharruar do të mbetet Kadare dhe vepra e tij do ndikojë në shekuj shpirtin dhe krenarinë tonë”.
