Mosaktivizi në asnjë prej ndeshjeve të Kampionatit Europian, ka sjellë një përplasje mes mbrojtësit të Kombëtares, Ardian Ismajlit dhe Silvinjos.
Duke u përpjekur që të kuptojë se pse nuk është preferuar titullar në asnjë ndeshje, “Panorama Sport” mëson se Ismajli ka shkëmbyer disa fjalë me trajnerin Silvinjo në lidhje me lënien në stol. Normalisht Ismajli, edhe pse i përmbajtur duke mos dalë nga kornizat, nuk mund të mos e shprehte pakënaqësinë për mosaktivizimin.
Sipas burimeve të gazetës, mbrojtësit nuk iu komunikua kurrë nga Silvinjo shkaku pse ai nuk po luan. Silvinjo e ka kaluar “thatë” këtë situatë, për ta lënë që të kuptohet se ka zgjedhur Ajetin përpara Ismajlit dhe këtu merr fund diskutimi.
Pritet të shihet se çfarë do të ndodhë në të ardhmen, duke qenë se Liga e Kombeve është “mbrapa derës” dhe gjithmonë nëse Silvinjo vazhdon në krye të Shqipërisë, një gjë është mëse e sigurt: marrëdhënia e Silvinjos me Ismajlin nuk do të jetë si më përpara dhe mes tyre ka patur një “krisje”.
