DHËRMI – Vrasja e 31-vjeçarit Eraldo Nevruzi në Dhërmi vijon të jetë në sitën e hetimeve teksa detaje të reja dalin në dritë. Mësohet se viktima dhe autori i ngjarjes, Gerald Shehu jetonin të dy në Angli. Dyshohet se ata ishin miq me njëri-tjetrin dhe kishin ardhur të dy në Shqipëri për të ngritur biznesin e tyre.
Por sipas raportimeve paraprake dyshohet se Shehu dhe Nevruzi kanë debatuar pak para mesnatës në një nga dhomat e hotelit “Greccia” ku dhe dyshohet se ka ndodhur krimi dhe më pas sherri ka degraduar në përdorimin e armës. Pasi e ka vrarë me armë zjarri dyshohet se Shehu ka fshehur trupin e 31-vjeçarit dhe më pas është arratisur drejt Greqisë.
Nga hetimet e deritanishme thuhet se dy janë pistat e hetimit: Një për një konflikt banal të çastit dhe tjetra për njohje të mëparëshme dhe përfshirje në aktivitete të paligjshme në Angli ku dhe viktima dhe autori jetonin.
