Shkroi: Jane Doe
Alfredo, mos u rehato shumë në fronin e Telebingos Shqiptare! Shumë shpejt do vijë koha të japësh llogari para taksapaguesve shqiptarë, që bashkë me faturën e dritave, paguajnë çdo muaj edhe për arredimin e zyrës tënde (atë abazhurin si kërpudhë besoj e ndez vetëm kur “lexon” Hustler-in).
Me çfarë parash e ke mobiluar zyrën e Drejtorit të Përgjithshëm? Ajo nuk është studioja e shtëpisë tënde! Pasi të largohesh shoqëruar nga Sazet e Përmetit, aty do ulet një tjetër drejtor (mos e dhëntë Zoti një klon të ri).
Po të kujtosh mirë ditën që ke ardhur, atë zyrë e ke gjetur fare modeste dhe të paprekur prej disa mandatesh. Nëse pikturat janë të tuat, apo t’i ka falur ndonjë piktor mediokër që e ke mik, mund t’i varësh ku dhe si të duash (jo shumë lart, se nuk i kap dot). Por ti nuk mund të transformosh 360° një ambient që nuk të përket!
Kush je ti që mendon se mund ta bësh zyrën e drejtorit të një institucioni si Bar Komiteti? Po raki u servir atyre që pret e përcjell me krenari? Të paktën mos nxirr foto! Ke dhe Ismail Qemalin mbrapa. Imagjino Alfredo çfarë fatkeqësie për atë Burrë me mjekër, ti që i kthen prapanicën tënde digjitale, ditë për ditë. #fundiibotës.
Po zyrën e mbledhjeve me çfarë e rinovove në kohë rekord? Si e rashinove parketin për 24 orë, kur dihet qartë që në një institucion publik duhet të bësh konkurs edhe për 1 kapëse letrash dhe jalla ta blesh pas ca muajsh? Ti s’ke as drejtor juridik! Mos më thuaj që e ke rashinuar me 1 milionëshin e kursimeve të tua… I ke lyer lekët me kollë dhe e ke rashinuar vetë. Mos o Zot! Ato doçka topolake nuk mund të mbajnë erë rëshirë, përveçse erë të mirë.
Po ato ekranet e televizorëve që u premtove kanaleve ditën e parë që fillove punë, ua bleve? Jo për gjë, po bëre dhe sikur mbajte shënim (në trurin tënd digjital, se gjenitë nuk shkruajnë në bllok).
Para se të fryheshe për transformimet që i ke bërë RTSH-së në kohë rekordi Guinnes, duhet të kishe bërë një xhiro nëpër zyra nja 8 vjet më parë, të shikoje se në ç’derrexhe ishin tavolinat dhe karriget ku punohej. Një murtajë kafkeske. Vinte era tradhti. Ajo ishte braktisja më dhimshme që mund t’i bëhej një godine të atij lloj graviteti.
Ajo lloj braktisjeje e bëri RTSH-në të humbte çdo lloj empatie ndaj publikut. Sigurisht nuk ishte faji i RTSH-së, por i ca dinosaurëve si ti. Mos kujto se ke lyer ca mure dhe ke patinuar ca studio dhe papritur bëhesh hero! Ato picat që u bleve punëtorëve që të instaluan ekranet në zyrë brenda natës, ata i kanë vjellë të nesërmen. Siç po vjellin sot vrerin e 1 viti pambarim gjithë ata që hoqe, por edhe ata që mbajte me dhunë.
Pleksiglasi i ri nëpër studio dhe robotët verbues nuk e bëjnë televizionin më të suksesshëm! As misionin më të realizuar.
Ti mund të blesh benevrekë prej mëndafshi, por benevrekët, benevrekë ngelen!
Post scriptum: Jep ca lekë andej nga Eurovizioni, të marrim çmimin e parë. Dai Fërdi! A do ta bësh të madhe fare?…
Vijon…
