Ruanda thotë se është gati të pranojë emigrantë nga Mbretëria e Bashkuar pasi Parlamenti britanik miratoi këtë javë një projekt-ligj të “bllokuar” më herët dhe të diskutueshëm që kërkon të frenojë valën e emigrantëve që kalojnë Kanalin Anglez me varka të vogla, duke deportuar disa prej tyre në vendin e Afrikës Lindore. Madje ka një vend gati dhe që pret për migrantët, Hope Hostel i rinovuar në lagjen e gjallë e të pasur të Kagugu, një zonë e kryeqytetit të Ruandës, Kigali, që është shtëpia e shumë emigrantëve dhe disa shkollave ndërkombëtare.
Në hotel dikur strehoheshin studentë të kolegjit, prindërit e të cilëve vdiqën në gjenocidin e vitit 1994, periudha më e tmerrshme e këtij kombi në histori, kur rreth 800,000 tutsi u vranë nga ekstremistët Hutu në masakrat që zgjatën mbi 100 ditë. Kryeministri britanik Rishi Sunak është zotuar se fluturimet e dëbimit do të fillojnë në korrik, por ka refuzuar të japë detaje ose të thotë se sa njerëz do të deportohen.
“Edhe nëse ata arrijnë tani ose nesër, të gjitha marrëveshjet janë në vend,” tha ai.
Plani u bllokua prej kohësh në gjykatat britanike dhe nga kundërshtimi i aktivistëve të të drejtave të njeriut që thonë se ai është i paligjshëm dhe çnjerëzor. Ai parashikon deportimin në Ruandë të disa prej atyre që hyjnë ilegalisht në Mbretërinë e Bashkuar dhe avokatët e emigrantëve janë zotuar të vazhdojnë të luftojnë kundër planit.
Masa synon gjithashtu të jetë një pengesë për emigrantët që rrezikojnë jetën e tyre në varkat e tejmbushura me shpresën se do të jenë në gjendje të kërkojnë azil sapo të arrijnë në Britani. Mbretëria e Bashkuar nënshkroi gjithashtu një traktat të ri me Ruandën për të forcuar mbrojtjen për emigrantët dhe miratoi legjislacionin e ri që e shpall Ruandën si një vend të sigurt.
“Kritikët e Ruandës dhe gjyqtarët e Mbretërisë së Bashkuar që më herët thanë se Ruanda nuk është një vend i sigurt janë provuar se kanë gabuar”, tha Mukuralinda.
“Ruanda është e sigurt.”
Menaxhmenti në Hope Hostel thotë se objekti është gati dhe mund të strehojë 100 persona me kapacitet të plotë. Qeveria thotë se do të shërbejë si një qendër tranziti dhe se më shumë akomodime do të vihen në dispozicion sipas nevojës. Mijëra emigrantë mbërrijnë në Britani çdo vit.
Pasi të mbërrijnë nga Britania, emigrantët do të dërgohen në dhomat e tyre për të pushuar, pas së cilës do t’u ofrohet ushqim dhe do t’u jepen disa pika orientimi për Kigalin dhe Ruandën, tha menaxheri i hotelit Ismael Bakina. Në ambientet e hotelit do të vendosen tenda për përpunimin e dokumentacionit të tyre dhe për informime të ndryshme. Vendi është i pajisur me kamera sigurie, të dukshme në të gjithë kompleksin.
Brenda kompleksit ka edhe vende argëtimi, një fushë mini-futbolli, një fushë basketbolli dhe volejbolli si dhe një dhomë lutjesh. Për ata që duan të pijnë duhan, “ka edhe një dhomë për pirjen e duhanit,” shpjegoi Bakina. Ushqimi do të përgatitet në kuzhinën kryesore të hostelit, por po ashtu po bëhen masa për ata që duan të përgatisin ushqimet e tyre, tha ai. Emigrantët do të jenë të lirë të ecin jashtë hotelit dhe madje të vizitojnë qendrën e qytetit aty pranë Kigali.
“Do të kemi përkthyes të ndryshëm, sipas gjuhëve të tyre,” shtoi Bakina, duke thënë se ata përfshijnë anglisht dhe arabisht.
Qeveria ka thënë se emigrantëve do t’u përpunohen dokumentet brenda tre muajve të parë. Ata që duan të qëndrojnë në Ruandë do të lejohen ta bëjnë këtë, ndërsa autoritetet do të ndihmojnë gjithashtu ata që dëshirojnë të kthehen në vendet e tyre.
Për ata që zgjedhin të qëndrojnë, Mukurilinda tha se qeveria e Ruandës do të mbajë përgjegjësi të plota financiare dhe të tjera për pesë vjet, pas së cilës ata do të konsiderohen të integruar në shoqëri. Në atë moment, ata mund të fillojnë të menaxhojnë veten.
