Detaje të reja kanë dalë në dritë, nga rrëfimet e miqve të Aurelio Dervishit, të riut që u vra më thikë mbrëmjen e të dilës në Tiranë. Vajza që dyshohet se u bë shkak për konfliktin mes grupeve të të rinjve, nuk ka marrë pjesë në ceremoninë mortore të 18-vjeçarit.
Dy shokët e viktimës për emisionin “Me zemër të hapur”, u shprehën se as adoleshentja dhe as 16-vjeçarja që ndodhin në makinë me ta në mbrëmjen e krimit, nuk kanë qenë të pranishme në ceremoninë mortore. Ndërsa shtuan se nuk i gjejnë dot as edhe në rrjetet sociale, për shkak se i kanë mbyllur. Më herët ata dëshmuan se njëra prej vajzave iu kishte pranuar atyre lidhjen që kishte me një nga vrasësit, Frensis Shehun.
“Vajzat nuk kanë qenë në varrim, në rrjetet sociale i kemi kërkuar, por nuk na dalin. Jemi të bllokuar. Për familjen e Aurelios dhe për ne nuk është e lehtë. Duam drejtësinë e shokut, askujt mos t’i ndodhë. Ne nuk jemi larguar, kemi qenë prezent aty në çdo sekondë”, thanë shokët e Aurelio Dervishit.
Ndërsa njëri prej tyre ngriti pretendimin se autorët mund t’i kenë bërë pritë, pasi takimi nuk mund të kishte qenë i rastësishëm.
“Nga shoqëria jonë kemi dëgjuar që kanë qenë tek kafja në momentin kur ne kemi shkuar dhe më pas kemi dalë. Thuhet se kanë dashur të na ndjekin, por i kemi ikur nga sytë. Kur jemi kthyer, jemi përplasur tek Rrethi i Shkozës. Kur kemi ardhur nga Unaza e Re, tek rrethi ata kanë marrë rrethin dhe kanë qenë afër nesh. Thonë që qenë hera e dytë që kanë dalë për të parë për ne. Unë jam mirë, kam plagë të vogla në sy, në trup kam marrë goditje dhe tek gjuri”, shtoi Mario, shoku i viktimës.
