Gjashtë personat e zhdukur pas shembjes së një ure rrugore në Baltimore të SHBA-së supozohen të vdekur, ndërsa kërkimet për të mbijetuar janë pezulluar.
“Bazuar në kohëzgjatjen e kërkimeve të kryera dhe temperaturën e ujit, në këtë kohë nuk vlerësojmë se do të gjejmë njerëz të gjallë”, shpjegoi zëvendësadmirali Shannon Gilreath gjatë një konference për shtyp.
Ata i përkisnin një ekipi ndërtimi që po riparonte gropat në momentin që u prish ura. Shumë automjete po kalonin urën, e cila është më shumë se 2.6 kilometra e gjatë, kur ajo u shemb pasi anija goditi një këmbë të saj.
Ekuipazhi më pas njoftoi zyrtarët e transportit të Maryland për një përplasje të mundshme, sipas një raporti të paklasifikuar të Agjencisë së Sigurisë Kibernetike dhe Sigurisë së Infrastrukturës mbi incidentin.
Guvernatori i Maryland, Wes Moore tha se mund të konfirmonte se ekuipazhi njoftoi autoritetet për një problem me energjinë, duke shtuar se anija kishte humbur energjinë përpara se të përplasej me një nga këmbët që mbështesin urën.
Varkat dhe helikopterët u përfshinë në një përpjekje masive kërkimi dhe shpëtimi për të gjetur gjashtë të zhdukurit. Dy të tjerë janë nxjerrë nga uji, me një në gjendje të rëndë.
