Një eksperiment hetimor ka befasuar hetuesit për ngjarjen e rëndë të vrasjes së Pëllumb Metës nga fëmijët e tij.
Hyseni, Hygerta, Amarildo dhe gruaja e Pëllumb Metës, Blerina Meta dinë të përdorin armë. Ky fakt është bërë i ditur falë një eksperimenti hetimor që është kryer nga prokuroria në një poligon në Durrës.
Por ky nuk është testi i vetëm që do të kalojnë. Pas kësaj, të gjithë do i nënshtrohen një tjetër eksperimenti. Të 4 do të rikthehen në kasolle, aty Hygerta Metës do i kërkohet që të hapë një gropë për të ‘imituar’ edhe njëherë momentin kur e vrau dhe varrosi të atin.
Pëllumb Meta u gjet i varrosur në kasollen e bagëtive pranë banesës së tij. Policia thotë se ai u vra nga Hysen Meta që bashkëpunoi me motrën Hygertën për ta kryer krimin. Më pas për të zhdukur trupin ka ndihmuar edhe vëllai tjetër, Amarildo. Të tre tashmë janë pas hekurave të qelisë në arrest me burg. Ndërkohë mamaja e tyre, Blerina po hetohet në gjendje të lirë. Por është e paqartë se kush e ka tërhequr këmbëzën. Fillimisht vrasjen e mori përsipër Hygerta, por Policia arrestoi edhe të vëllanë e saj Hysenin.
