TIRANË– Gjykata e Lartë ka refuzuar kërkesën e SPAK për të rikthyer në burg Jamarbër Malltezin. Prokuroria e Posaçme kishte bërë rekurs për ndryshimin e masës së sigurisë ndaj Malltezit nga “arrest në shtëpi” në “arrest në burg”.
Ndërkohë, po sot Gjykata e Lartë refuzoi edhe kërkesën e ish-kryeministrit Sali Berisha dhe Jamarbër Malltezit të cilët kërkuan ndryshimin e masës së sigurisë. Gjykata e Posaçme një ditë më parë shtyu për më 8 mars seancën për heqjen e masës arrest në shtëpi për Berishën dhe dhëndrin Malltezi.
Berisha dhe Malltezi ndodhen në arrest shtëpie pasi akuzohen si të përfshirë në dosjen e privatizimit të ish-kompleksit “Partizani”. Si Berisha ashtu edhe Malltezi i kanë kundërshtuar akuzat dhe e kanë cilësuar hetimin si të orkestruar nga kryeministri Edi Rama.
