Detaje të reja janë bërë me dije në lidhje me tragjedinë e regjistruar disa ditë më parë në Lushnjë ku një shpërthim në një magazinë në ndërtim e sipër u mori jetën Roland dhe Elidon Hoxhës, babë e bir. Referuar dosjes hetimore të Prokurorisë së Lushnjës, e cila po heton ngjarjen Kryeinspektori i Inspektoriatit të Mbrojtjes së Territorit në Lushnjë, Robert Kola ka deklaruar se nuk ka pasur dijeni se deputeti i Partisë Socialiste Bujar Çela (I cili mbeti dhe vetë i plagosur) po ndërtonte në zonë.
Kola ka shpjeguar se nuk ka pasur dijeni nëse deputeti i PS Bujar Çela po ndërtonte apo kishte marrë leje ndërtimi sa i takon kapanonit ku ndodhi shpërthimi në lagjen ‘Karbunarë e Madhe’. Ai shton se nuk ka pasur informacione nga urbanistika apo njësia administrative se aty po kryheshin punime. Po ashtu dhe nga kontrollet në terren nuk ka rezultuar se aty po kryheshin punime.
Gjatë dëshmisë së tij Roland Kola ka shpjeguar se sistemi online i bashkisë nuk ka funksionuar dhe gjatë kësaj kohe nuk është bërë asnjë inspektim për objektin në fjalë që po ndërtohej.
Në të njëjtën linjë me Kolën ka qenë dhe i IMT-së, Jetnor Xhunga. Ky i fundit ka deklaruar se sistemi që nxjerr lejet e ndërtimit të bashkisë ka kohë që nuk funksionon dhe nuk ka pasur dijeni për ndërtimin e subjektit të deputeti Bujar Çela.
