27-vjeçari shqiptar, i cili akuzohet se detyroi partneren e tij 19-vjeçare të abortonte, u la i lirë me kusht ditën e hënë.
Në prononcimet e tij për Star, ai theksoi se “nuk kam bërë asgjë për të cilën më akuzon”, ndërsa shtoi: “Doja fëmijën, jam i trishtuar”.
Në të njëjtën kohë ai ka mohuar kategorikisht akuzat se e ka rrahur dhe i ka dhënë pilule.
“Asnjë nga këto. Unë nuk di asgjë as për pilulat. Nuk e di as ku i gjeti, kur i mori…”
Madje, ai i ka bërë apel 19-vjeçares që të thotë të vërtetën, ndërsa ka thënë se ajo ishte dashuria e tij e parë.
“Për herë të parë në jetën time kisha rënë në dashuri”.
Nga ana tjetër, 19-vjeçarja duke folur për mediet greke tha se ishte e frikësuar se 27-vjeçari shqiptar mund ta lëndonte pas daljes nga burgu.
“Kam shumë frikë se u lirua, mund të më lëndojë mua ose gjyshen. Ai na tha se nëse shkon në burg do të na dëmtojë. Unë nuk e di çfarë të them. Ky njeri nuk ndjen keqardhje për vrasjen e fëmijës tim?” tha 19-vjeçarja duke folur për Mega.
