Hetimet për ish-ministrin e Shëndetësisë, Ilir Beqaj janë shtrirë deri në Poloni. Kështu ka deklaruar gazetarja Klodiana Lala në një intervistë që ka dhënë për “Breaking”. Teksa diskutoi çështje të ndryshme në lidhje me gjyqësorin, gazetarja Lala u ndal edhe në hetimet që ka nisur Prokuroria e Posaçme kundër Korrupsionit dhe Krimit të Organizuar për ish-ministrin. Sipas saj, paratë, të cilat ish-ministri akuzohet se i ka përvetësuar, kanë përfunduar në Poloni. Ndaj dhe SPAK i ka zhvendosur hetimet në vendin e Europës Lindore për të zbuluar më shumë.
“Zhvillime të qenësishme dhe rëndësishme për ish ministrin e Shëndetësisë, Ilir Beqaj, i cili u duk sikur shpëtoi përfundimisht nga Koncesioni i Sterilizimit, por ka një hetim të ri për abuzimet me fondet e agjencisë SASPAC që ai drejtonte. SASPAC është agjencia që koordinonte ndihmat, apo fondet e huaja që vinin nga jashtë vendit dhe që ka dyshime të forta sipas SPAK, jo vetëm për abuzime, por edhe lidhje klienteliste me kompani farmaceutike, por edhe për fshehjen e pasurisë. Hetimet në këtë drejtim janë duke ecur në mënyrë të vrullshme, por ka pasur të dhëna të reja dhe kam informacione se në zyrën e SASPAC në zyrën e Beqajt janë gjetur dosje, që nuk kishin të bënin fare me SASPAC, por dosje që kishin të bënin me kohën kur Beqaj drejtonte ministrinë e Shëndetësisë. Unë e pyeta Z. Beqaj përse i mbante ato dosje në zyrën e tij dhe ai tha se “janë dosjet të mia”, por nuk dha shpjegime se pse ato dosje që duhet të ishin në arkivën e ministrisë së Shëndetësisë janë në zyrën e tij. Në këtë aspekt janë duke u parë shumë dosje, jo vetëm të kohës që ka drejtuar SASPAC, por edhe kur drejtoi Ministrinë e Shëndetësisë, lidhjet klienteliste, favorizimet me kompanitë të ndryshme dhe mënyrën si kanë devijuar paratë dhe hetimi ka shkuar deri në Poloni, aty ku mendohet se janë transferuar para dhe po priten detaje prej andej,”- tha Lala.
Ilir Beqaj është duke u hetuar dhe për pasurinë e tij, për shkak se ka dyshime që ai të ketë pasur kompani të fshehta përmes njerëzve të tij të besuar. Në një rast ka qenë gruaja e tij aksionere në një kompani farmaceutike, dhe në rastin tjetër vetë Beqaj dyshohet se është pronar i fshehtë i restorantit “Gzona” që gjendet pranë Kalasë së Tiranës. Ish-ministri akuzohet për “Shpërdorim detyre” në bashkëpunim, “Shkelja e barazisë së pjesëmarrëve në tendera apo ankande publike” kryer në bashkëpunim dhe “Korrupsioni pasiv i funksionarëve të lartë shtetëror ose i të zgjedhurve vendorë”, sa i përket procedurës së dhënies së koncesionit të sterilizimit, në kohën që ishte në krye të Ministrisë së Shëndetësisë. Po ashtu, Ilir Beqaj po hetohet për veprën penale të “shpërdorimit të detyrës”, kryer në bashkëpunim, sipas gjyqtarit Erjon Bani, Beqaj edhe ka falsifikuar vula, stampa dhe formularë. Në funksion të hetimeve, në fund të vitit 2023, u ushtruan kontrolle në banesën dhe disa kompani farmaceutike në pronësi të Beqajt.
