Lorenzo Pjetrushi, një i ri shqiptar me banim në Itali, ka humbur jetën teksa po bënte një sfidë për Tik Tok. Ai u ngjit në kapakun e makinës që drejtohej nga kushëriri i tij, për të provuar aftësinë e tij për të qëndruar në këmbë, pavarësisht makinës në lëvizje. Por ai humbi ekuilibrin dhe ra në asfalt, duke u goditur nga e njëjta makinë: pak çaste, kushëriri i tij nuk pati kohë të frenonte.
Lorenzo Pjetrushi, ka vdekur mbrëmjen e djeshme, 29 Janar, pas 9 ditësh në gjendje kome në spital.
Lorenzo ishte djali i tretë dhe më i vogli i familjes së tij, ndërsa ëndërronte që të bëhej mekanik. Në një intervistë për mediat italiane babai i tij është shprehur se 18-vjeçari e donte shumë jetën.
Episodi i sfidës në TikTok daton në 20 janar. Në mbrëmje vonë, rreth orës 23:00, Lorenzo ishte në shoqërinë e katër bashkëmoshatarëve kur vendosi të provonte veten e tij në këtë lojë të çmendur. Kushëriri ishte ai që drejtonte makinën, ndërsa si pasagjerë ishin tre miq të tyre.
Sfida për të ruajtur balancë, është shumë e përhapur në TikTok, duke i ekzpozuar të rinjtë drejt skenave të rrezikshme. Lorenzo u ngjit mbi makinë, por humbi ekuilibrin dhe ra në asfalt, vetëm për t’u goditur nga Ford Focus i drejtuar nga kushëriri i tij.
Miqtë e djalit kanë lajmëruar menjëherë urgjencën, të cilët kanë shkuar në vendngjarje me një autoambulancë, duke bërë të mundur dërgimin e shpejtë të të riut në spital. 18-vjeçari u dërgua menjëherë, me kodin e kuq, në spitalin e Trevisos, ku gjendja e tij u shfaq menjëherë e dëshpëruar. Dhe në fakt mbrëmjen e djeshme, pas 9 ditë agonie, zemra e Lorencos pushoi së rrahuri.
Ndërkohë, pas operacioneve të shpëtimit, në vendngjarje kishte mbërritur edhe policia për të kryer hetimet dhe rikonstruksionin e dinamikës. Më pas kanë sekuestruar edhe makinën ku djali kishte tentuar këtë sfidë të çmendur.
