Tensionet që kanë shoqëruar Kuvendin e Shqipërisë, ku maxhoranca dhe opozita janë ‘përplasur’ për çështje të ndryshme, janë “shpërngulur” edhe në sallën e Komisionit Europian në Bruksel. Këtë herë pa tymuese dhe pa zëra të ngritur deri në qiell, përfaqësuesit e maxhorancës dhe opozitës kanë komentuar situatën në parlament, ku punimet po mbahen në kushte të pazakonta prej 3 muajsh.
Në komisionin për Stabilizim-Asociimit BE-Shqipëri, Pandeli Majko tha se SPAK është duke hetuar çdo zyrtar të lartë të Shqipërisë që është përfshirë në korrupsion, duke shkuar deri në nivel të zv kryeministrit të vendit. Ai shtoi se është e pamundur të bëhet realitet kërkesa e opozitës, sepse nuk mund të ngrihen 8 Komisione Hetimore. Majko tha se gjithsesi nuk përjashton mundësinë që qeveria të ketë bisedime me opozitën, me qëllim që të gjendet zgjidhja.
Majko: Në tre muaj, opozita po bllokon punimet. Parlamenti është mekanizëm i rëndë dhe jo një Ferrari. Opozita ka kërkuar 8 komisione hetimore, që duhet të ketë 15 anëtarë. E kuptoni mbi ngarkesën. Nuk ka rezerva, por opozita të kuptojë të drejtën dhe matematikën. Jemi gati të ulemi të diskutojmë. Parlamenti nuk është institucion hetimor. Korrupsioni nuk duhet të jetë trajtim politik.
I menjëhershëm ka qenë reagimi i përfaqësuesit të opozitës, Gazment Bardhi. Ai theksoi se nuk janë kërkuar 8 Komisione Hetimore njëkohësisht. Më tej Bardhi ka vlerësuar Majkon për faktin se ka ofruar dialog, por shtoi se qeveria nuk ka lënë hapësira për të dialoguar.
Bardhi: Nuk kemi kërkuar tetë komisione hetimore njëkohësisht. Kemi tetë kërkesa gjatë dy viteve. Ekzaktësisht pas atij që përmendi Majko që ishte i suksesshëm dhe që falë tij SPAK prodhoi akuza për korrupsion ndaj ish-zyrtarëve. Që prej aty mazhoranca ndaloi komisionet. Në sesionin e fundit janë rrëzuar tre kërkesa. Janë refuzuar katër kërkesa për interpelancë. Janë 31 projektligje të pashqyrtuara. Ligjet me porosi të mazhorancës miratohen pa u futur në kalendar. Ndaj nuk kanë lejuar funksionimin normal të parlamentit. Vlerësoj gatishmërinë për dialog. Por në tre muaj nuk kemi gjetur dorën e shtrirë për dialog, kemi parë shtimin e masave agresive arrogante ndaj opozitës. Ndryshime të njëanshme nuk janë dorë e shtrirë. Por, janë mesazh i mungesës së vullnetit.
Gjatë diskutimeve që janë zhvilluar për Shqipërinë, edhe eurodeputetët e kanë vënë theksin tek nevoja për dialog në Shqipëri, me qëllim që të avancohet me bisedimet për integrimin europian të vendit.
