10 mijë hapa në ditë duken si objektiv i vështirë e vështirë për t’u përmbushur nga ish-kryeministri Sali Berisha tani që është vendosur nën masën e sigurisë “arrest shtëpie”. Por kreu i Partisë Demokratike duket se ka gjetur zgjidhjen për të përmbushur ritualin e tij të përditshëm. Ai ka dalë në tarracën e pallatit për ajrosje.
Në videon e siguruar nga “News24” shihet Berisha duke ecur përgjatë tarracës, teksa bën xhiro në tarracë, i vetëm dhe i pashoqëruar. Mesa duket sot, duke shfrytëzuar edhe motin e mirë, ka bërë pak sport. “Fiksimin” e tij për 10 mijë hapat në ditë e ka treguar në çdo dalje, si sekretin e tij për të mbajtur trupin në formë.
“Unë bëhem 78 vjeç. Unë jam njeri që i besoj forcës së kalitjes. Domethënë, dy janë sekretet antiplakje, puna është e para, asgjë nuk të mban më në formë trurin se sa puna dhe e dyta, padiskutim sforcimi fizik, eforti fizik. Unë e pëlqej shumë, natyrisht, në të gjitha format e sforcimit fizik ka qenë ecja. Ose nga të gjitha veglat, unë pëlqej eliptoidin. Unë bëj mbi 10 mijë hapa në ditë, i vetëm,“- është shprehur më herët Berisha.
Por në kushtet që është duket që të përshtatet, pasi aktualisht ish-kryeministri ndodhet në masën ‘arrest shtëpie’, në lidhje me dosjen ‘Partizani’.
