Kryeministri Edi Rama, nga kryeministria, ka përkujtuar katër viktimat e 21 janarit 2011. Shefi i qeverisë, u shpreh së katër dëshmorët humbën jetën në mënyrë të padrejtë.
Ai tha se vendimi i Gjykatës Evropiane të të Drejtave të njeriut është detyrues dhe drejtësia shqiptare nuk duhet të humbasë kohë, por ta marrë në dorë hetimin e plotë të asaj ngjarje, që Rama e konsideroi si krim shtetëror.
“Ne jemi së bashku jo vetëm për të përkujtuar, por është për ti thënë këto fjalë, sepse ka më në fund përveçse sa thjesht shpresë, pakëz dritë në rrugën e gjatë të këtij tuneli. Fjalët e shpresë sonë sot nuk dalin vetëm nga dëshira e paepur për të mos iu dorëzuar errësirës mbytës të sistemit të vjetër të drejtësisë, por nga shenjat e zgjimit të drejtësie edhe për 21 janarin, njëra shenja është e drejtpërdrejtë, vendimi i Gjykatës Evropiane, i cili e cilëson 21 janarin, e zeza mbi të bardhë, si krim shtetëror të pahetuar. Shenja tjetër, është veprimtaria e gjykatës së posaçme, e cila së fundmi ka hyrë në një fazë të re kuptimplotë duke e thyer akullin e shtresëzuar prej 100 e kusur vitesh të shtetit shqiptar dhe drejtësisë”, tha Rama.
Më tej, Rama shtoi se, “21 janari është sa një nevojë për drejtësi të drejtpërdrejtë lidhur me një krim shtetëror, aq dhe një motiv, pasqyrë për të kuptuar më së miri se cila është detyra jonë, si udhëheqës dhe garant politik, i reformës në drejtësi, ndërkohë që Shqipëria është në një sfidë të vërtetë mes të shkuarës së padrejtësisë dhe të ardhmes që duhet më patjetër ta bëjmë të sotme të Shqipërisë si shtet të së drejtës.”, tha Rama.
