Ish-ministri i Mbrojtjes Fatmir Mediu ka ndarë detaje të reja sa i përket shpërthimit në fabrikën e demontimit të armëve në Gërdec dhe telefonatën që ka pasur me Shkëlzen Berishën. Mediu u shpreh se nuk ka folur me djalin e ish-Kryeministrit Sali Berisha, Shkëlzen Berisha ditën e ngjarjes ndërsa shtoi se me Shkëlzenin ka folur një ditë para ngjarjes së rëndë që ndryshoi jetën e shumë njerëzve. Po ashtu, shpreh se ka folur dhe 3 orë pas ngjares për një çështje personale. Komentet i bëri i ftuar në “Report Tv”.
Biseda:
Pyetje: A ka patur rol Shkëlzen Berisha në fabrikën e Gërdecit?
Fatmir Mediu: Pse duhet të më pyesni mua, ai ka qenë në gjykatë…
Pyetje: A keni pasur telefonatë me të para dhe pas shpërthimit?
Fatmir Mediu: Jo s’ka pasur para dhe pas shpërthimit. Ka pasur ditën përpara dhe pas shpërthimit nja 3 orë më pas për një çështje të interesit tim që nuk e përballoja dot në Shqipëri. Ka qenë çështje familjare. Çfarë do më zgjidhte mua Shkëlzen Berisha? T’i thosha të më hapë telefonin kryeministri. Unë kam qenë në kontakt me kryeministrin kur ka ndodhur kjo ngjarje.
Po ashtu ish-ministri i Mbrojtjes, nuk përjashtoi mundësinë që të kemi të bëjmë me një skenar rus në shpërthimin në Gërdec.
Fatmir Mediu: S’kam dashur të futem por meqë po më pyet, ka pasur një ekip amerikan ekspertësh që kanë vlerësuar çka ndodhur. Kanë thënë 5 shkaqe të ndryshme dhe s’kanë vënë gishtin te asnjëra. Saldimi i karrocës është njëra. Djali i të ndjerit Deliu që humbi jetën që pretendohet se ka salduar karrocën ka thënë që unë kam qenë në shtëpi nga ora 12 deri kur ka ndodhur shpërthimi dge babai nuk ka salduar karrocë, unë kam qenë aty. Është një dëshmitar okular…. Jashtë kontekstit eksperrimental është interesi kombëtar. Troç ne nuk kemi këshill të sigurisë kombëtare. S’kemi analizë të inteligjencës në Shqipëri. Marrim informacione i shikojmë dhe i hedhim në vendin që na takon si informacion kosnfidencial. S’kemi analizë të problemeve që shtron inteligjenca. Jemi vend anëtar i NATO-s Unë kam thënë disa gjëra që duhet të kishin interesin e medias dhe të institucioneve. Kam kërkuar në atë kohë që të mblidhet këshilli i sigurisë kombëtare. Një muaj para Gërdecit unë nuk kam qenë vetëm por me drejtorin e shërbimit informativ të sigurisë… Interesi i anëtarësimit të Shqipërisë në NATO binte ndesh me interesat e Rusisë. Sot e kësaj dite vazhdon e njëjta politikë. Ne kemi pasur qejf të merremi me fuqi të mëdha të themi se kemi armiq të mëdhenj se na dukej sikur bënim veten më të mëdhenj. Unë mendoj se vende që kanë interesa gjeopolitike në rajonin e ballkanit nuk i lënë interesat në dorë të rastësisë. Në mbledhjen e sigurisë në Mynih, Putin përherë të parë doli dhe tha: Naton e kemi kundërshtare. Në 2007. Nuk mendoj se po bënte poezi por është politikë. Dhe sot them armatosja e Serbisë raporti me Serbinë etj vijnë ndesh interesave atlantike të shqiptarëve dhe të rajonit në ballkanit.
Fatmir Mediu akuzohet për shpërdorim detyre të kryer në bashkëpunim me zinxhirin komandues ushtarak. Ish-ministri u rikthye në Gjykatë nga denoncimi i një familjeje nga Gërdeci, fshati i tragjedisë së 15 marsit ku nga shpërthimi humbën jetë 26 persona e u plagosën 300 të tjerë.
