Dy vëllezërit që mbetën viktimë e krimit brenda familjes në zonën e Freskut në Tiranë, do të përcillen sot për në banesën e fundit. Njoftimi është bërë nga familja e të dy viktimave, ndërkohë që vëllezërit do të përcillen së bashku për në varrezat e Tufinës.
Timoni.al ka siguruar dhe foton e njërit prej viktimave, 68-vjeçarit Lulzim Cami, në banesën e të cilit ndodhi dhe ngjarja e rëndë. Vehap Cami sapo ishte kthyer nga Anglia, dhe kishte shkuar për vizitë në banesën e të vëllait, të cilit i mori dhe jetën. Më pas ai vrau veten me të njëjtën armë. Djemtë e Lulzimit, të cilët kanë bërë edhe njoftimin në rrjetet sociale, kanë pranuar ngushëllimet për babanë por edhe xhaxhanë e tyre, i cili kreu krimin e rëndë.
Burime bëjnë me dije se të dy vëllezërit, dhe familjet e tyre kanë jetuar së bashku në zonën e 5 Majit në Tiranë, por pas prishjes së banesës së tyre, ata janë detyruar që të marrin shtëpi me qera në zona të ndryshme. Megjithatë konflikti i vjetër mes tyre, për prona që kanë pasur në vendlindje, në zonën e Bulqizës, vetëm sa është ndezur me kalimin e viteve.
