Edi Rama nuk është i shqetësuar për hetimet që po zhvillon SPAK-u për dosjen e ish-agjentit të FBI-së, McGonigal që u dënua për dosjen ruse dhe për çështjen shqiptare do të vendoset në shkurt. “Ajo çështje është hetuar në SHBA dhe nuk ka lidhje me asgjë nga këto që thuhen këtu. Por SPAK-u le ta hetojë, nuk ka asnjë problem” tha ai.
Kryeministri u pyet edhe për nismën e Ballkanit të Hapur duke deklaruar se nuk është mbyllur. “Sot po e marr vesh që e paskam mbyllur Ballkanin e Hapur. Ballkani i Hapur nuk hapet dhe mbyllet nga një person me një çelës apo ndonjë person. Nuk kam thënë asnjëherë që kam mbyllur Ballkanin e Hapur. Kam thënë diçka tjetër në një kontekst të caktuar, që e ka kryer misionin e vet, por që nisma në vetvete është një nismë si të tjera që nuk hapet dhe mbyllet nga unë nuk ka asnjë diskutim. Panairi i verërave në Beograd u zhvillua para pak javësh. Ajo nismë vazhdon. Shqipëria është në këtë nismë” tha ai.
Ai u pyet edhe për raportin me presidentin serb Aleksandër Vuçiç. “Marrëdhënia me Presidentin e Serbisë është marrëdhënie që nuk ka asgjë tjetër veç interesit të Shqipërisë dhe rajonit. Nuk më pengon mua dhe ne t’i themi të bardhës të bardhë dhe të zezës të zezë. Nuk ka pasur asnjëherë luhatje qoftë kur ka qenë rasti që Serbia nuk duhej sanksionuar, ashtu edhe kur Serbia bëri akt flagrant kundër të gjitha vlerave europiane me shpalljen e zisë për kriminelët e Banjskës dhe aktin e terrorit në Banjskë” tha ai.
