Sot nis viti i ri shkollor 2023-2024. Rreth 29 mijë nxënës do të ulen në bankat e shkollës për herë të parë. Ndërkohë rreth 27 mijë nxënës janë regjistruar në klasën e 10-të. Rreth 800 punonjës të shërbimit psiko-social janë në shërbim të nxënësve me numër të shtuar kabinetesh të shërbimit Psiko-Social, nga rreth 400 në rreth 560.
Klasat burimore për nxënësit me aftësi ndryshe, nga 120 bëhen 279 (rreth 280). Sakaq 100 shkollave ku ka laboratorë Smart (smartlab) do t’i shtohen këtë vit edhe 200 shkolla të tjera. Shkolla, të cilat së bashku me laboratorët shkencorë do ta rrisin më shumë cilësinë e mësimdhënies
Urimi i kryeministrit Rama
‘Sot, kur dyert e shkollës janë çelur dhe një rrugëtim i ri i dijes sapo ka nisur me himnin kombëtar, u dërgoj një urim të përzemërt për sa më shumë sukses e mbarësi të gjithë fëmijëve, nxënësve, mësuesve e prindërve të gjithë Shqipërisë.’
Urimi i kreut të PD, Lulzim Basha
‘Ju uroj nga zemra mbarësi të gjithë nxënësve dhe mësuesve që nisin sot vitin e ri shkollor. Urime për prindërit shqiptarë, që me punë e sakrifica ushqejnë ëndrrat për të ardhmen e fëmijëve të tyre dhe dashurinë për dijen”.
Ministri i Brendshëm Taulant Balla
“Mirëmëngjes dhe shumë suksese nxënësve dhe mësuesve në këtë vit të ri shkollor. Policia e Shtetit do të bëjë gjithçka për të garantuar siguri e qetësi pranë mjediseve shkollore”.
Kreu i Partisë së Lirisë, Ilir Meta
“Suksese dhe urime të përzemërta të gjithë nxënësve tanë për fillimin e vitit të ri shkollor dhe veçanërisht nxënësve që ulen sot për herë të parë në bankat e shkollës. Uroj vit të mbarë e plot suksese të gjithë mësueseve në misionin e tyre fisnik. Uroj edhe prindërit për një vit sa më të suksesshëm për fëmijët e tyre. Sakrifica e jashtëzakonshme të prindërve shqiptarë për t’u mundësuar fëmijëve arsimim sa më cilësor, një ditë do të shpërblehet”
Presidenti Bajram Begaj
‘Suksese në vitin e ri shkollor për çdo nxënës, mësues dhe prind në Shqipëri. E në veçanti për të gjithë ata nxënës që hyjnë në klasë të parë! Puna dhe përkushtimi juaj i sotëm, ndërtojnë Shqipërinë e së nesërmes.’
