Prej orës 09:00 të mëngjesit të sotëm, Ilir Beqja shoqëruar nga avokati Ermal Yzeiraj ndodhet në Prokurorinë e Posaçme. Tetë orë deri tani dhe nuk dihet sa do të zgjasë beteja brenda.
Dy prokurorët, i pari Edvin Kondili që e ka shpëtuar nga burgu dhe Eneid Nakuçi po e marrin për të disatën herë në pyetje për dosjen e koncesionit të Sterilizimit.
Por socialisti ka edhe probleme të tjera me drejtësinë, pasi u hapën letrat për pasurinë e tij ku dolën në dritë fatura fiktive dhe njerëz që menaxhonin bizneset e tij.
Në dalje, Beqaj tha për gazetarët se çështja është komplekse dhe seancat e marrjes në pyetje do të vazhdojnë ditë të tjera.
“Janë disa seanca të gjata pyetjesh që do të thotë që çështja është komplekse, është e gjerë. Edhe sot nuk përfunduam seancat e pyetjeve, do të vazhdojmë edhe në ditët e tjera sidomos kur të kemi të plota edhe materialet e KLSH sepse pikënisja e atyre çfarë pretendohet në masën e sigurisë ndaj meje janë raportet e KLSH. Gjithashtu besoj se hetimet me sa kemi parë deri tani janë ende shumë të ngushta, është e domosdoshme që të shtrihen në 2 pjesë. Së pari, nga Marsi 2011 deri në Shtator 2013 për të hetuar tashmë pse 2 vjet e gjysmë u mbajt në qese ai central dhe nuk u vu asnjëherë në punë. Por edhe tashmë janë bërë 8 vjet nga zbatimi i kontratës për të hetuar kush janë përfitimet e drejtpërdrejta të qytetarëve dhe buxhetit të shtetit nga zbatimi i kësaj kontrate. Sot gjithashtu me prokurorët komunikuam dhe më konfirmuan që do kem së shpejti ato sende që u sekuestruan në 28 Dhjetor por që lidhen me vazhdimin e hetimit për sterilizimin. Dy dokumentet e udhëtimit jashtë shtetit që sot i mora dhe faktin që pasi të përfundojnë këto inspektimet elektronike të marra në shtëpi, do të kthehen. Besoj se ajo që është e rëndësishme sot u sqarua dhe fakti që gazi dhe aneksi 8 kanë lidhje sterilizimi dhe s’kanë asnjë lidhje me çështjen tjetër”, tha ish-ministri i Shëndetësisë Ilir Beqaj.
Ky i fundit është nën hetim nga Prokuroria e Posaçme për dosjen e e koncensionit të sterilizimit dhe dyshohet për shpërdorim detyre. Ndaj tij ka masë sigurie detyrim paraqitje.
Sot ishte hera e tretë që Beqaj u pyet nga SPAK. Ai u paraqit në Prokurori që prej orës 09:00 nën praninë e avokatit.
Për të njëjtën dosje, në burg ndodhet ish-zëvendësministri i Shëndetësisë Klodian Rjepaj dhe biznesmeni që fitoi koncensionin, Ilir Rrapaj.
