Në kuadër të forcimit të sigurisë ushqimore, Agjencia Kombëtare e Ushqimit (AKU) do të marrë në funksion 7 laboratorë të rinj, të financuar nga Banka Botërore, me një kosto totale prej 22,5 milion eurosh. Ndër këta, katër laboratorë do të vendosen në Shkodër, Durrës, Fier dhe Korçë, ndërsa tre të tjerë do të krijohen në Tiranë, Gjirokastër dhe Vlorë, duke u mbështetur me pajisje të thjeshta për analiza rutinë.
Koordinatori i projektit nga Banka Botërore, Bledi Mile, theksoi se laboratorët do të fokusohen në produkte dhe kultura specifike të zonave përkatëse: Laboratori i Shkodrës do të përqendrohet në bimët medicinale, ai i Korçës në shëndetin e kafshëve, laboratori i Fierit në analizat e perimeve dhe frutave, ndërsa laboratori i Durrësit, si pika kryesore e import-eksportit, do të shërbejë për një gamë të gjerë analizash.
Aktualisht, Instituti i Sigurisë Ushqimore dhe Veterinarisë (ISUV) kryen rreth 700 mijë euro analiza jashtë vendit çdo vit, për shkak të mungesës së kapaciteteve për të testuar produktet ushqimore në vend. Ky proces do të reduktohet ndjeshëm me investimet e reja, pasi 2.5 milion euro do të përdoren për blerjen e pajisjeve moderne.
“Me investimet e Bankës Botërore, ne do të rrisim gamën e analizave dhe do të ulim kostot operacionale,” nënvizoi Mile, duke aluduar në përmirësimin e kapaciteteve analitike në vend.
Përveç laboratorëve, projekti parashikon ndërtimin e katër magazinave për mallrat e dyshuara, të cilat do të pajisen me dhoma frigoriferike për ruajtjen e ushqimeve deri në përfundimin e testeve. Kjo do të ndihmojë në garantimin e sigurisë ushqimore dhe përmirësimin e standardeve të kontrollit për produkte ushqimore në Shqipëri.
