KORÇË – Një 60-vjeçar u gjet i pajetë në banesën e tij në Korçë, ndërsa dyshohet se ka ndërruar jetë prej disa muajsh. Lidhur me ngjarjen ka folur dhe vëllai i viktimës.
Ai ka treguar për News24 se 60-vjeçari kishte probleme kardiake dhe trajtohej me kemp, por jetonte i vetëm dhe se nuk kishin pasur komunikim prej muajsh. Kanë qenë fqinjët ata që kanë njoftuar policinë lidhur me ngjarjen.
“Vëllai im prej dhjetorit nuk ishte parë nga komshinjtë. Unë s’kam pasur komunikim me të, sepse jetoj në Tiranë dhe merrem me punë. Tani që mora lejen e zakonshme, erdha të shoh shtëpinë, sepse e kemi të përbashkët me vëllain. Kur erdha, e gjeta të pajetë. Vëllai im nuk ka telefon, ndaj nuk komunikonim. Ai ishte i ndarë nga bashkëshortja. Ka dy fëmijë: e bija jeton jashtë shtetit, ndërsa i biri jeton në Tiranë. Tani e lajmërova dhe është nisur për këtu. Vuante nga zemra dhe trajtohej me kemp”, tha ai.
