SPAK zbuloi se babë e bir Ilir dhe Darjo Jashari drejtornin një skemë të madhe kontrabande cigaresh raporton Skyweb.al.
Prokuroria e Posaçme Kundër Korrupsionit dhe Krimit të Organizuar ka goditur një nga skemat më të sofistikuara të kontrabandës së cigareve në rajon, e cila dyshohet të jetë zhvilluar përmes një rrjeti të gjerë të organizuar kriminal, me pjesëmarrjen e shtetasve shqiptarë, të huaj dhe punonjësve të strukturave doganore shqiptare. Procedimi penal nr. 20 i vitit 2023 ka si epiqendër subjektin “Albania Tabak”, një fabrikë prodhimi cigaresh me autorizim për regjim të përpunimit aktiv (RPA).
Skema: Nga lehtësirat doganore tek destinacionet fiktive
Fabrika, e pajisur me autorizim për të përpunuar lëndë të parë pa detyrime tatimore me destinacion eksportin, dyshohet se ka simuluar marrëveshje të rreme me firma të huaja, ndërkohë që cigaret janë prodhuar dhe mbetur brenda territorit shqiptar, për të hyrë më pas në tregun e kontrabandës në vendet fqinje dhe më tej në Bashkimin Europian.
Hetimet zbuluan se në më shumë se 30 raste, ngarkesat janë deklaruar për eksport në doganën dalëse, por janë shkarkuar në Shqipëri, pa pagesë të akcizës apo detyrimeve të tjera, duke i hapur rrugën kontrabandimit në rajon. Në disa raste është përdorur edhe sistemi doganor “Asycuda World” për të simuluar dalje fiktive nga territori i Shqipërisë.
SPAK thekson se prodhimi i cigareve është kryer pa pullë fiskale, në shkelje të ligjit për akcizat, çka e përjashtoi plotësisht shtetin shqiptar dhe vendet ku përfunduan cigaret nga të ardhurat ligjore të kësaj veprimtarie.
Humbje marramendëse dhe ndihmë ndërkombëtare
Sipas llogaritjeve zyrtare, skema ka sjellë një dëm prej 3.6 miliardë lekësh ndaj buxhetit të shtetit shqiptar dhe, nëse kontrabandimi në BE do të kishte përfunduar me sukses, humbjet do të kapnin vlerën 2.8 milionë euro. Në të paktën katër raste, ngarkesat kanë kaluar dhe kanë shkaktuar 10 milionë euro humbje të drejtpërdrejta për vendet e BE-së.
Në hetim janë përfshirë dhe autoritetet e Britanisë së Madhe, Greqisë, Qipros dhe Kosovës, të cilat kanë asistuar në hetime dhe në zbatimin e masave të sigurisë.
Vendimet e Gjykatës për të dyshuarit
Me kërkesë të SPAK, Gjykata e Posaçme ka caktuar masa sigurimi për 40 persona. Konkretisht:
- Arrest në burg për pronarët dhe drejtuesit e fabrikës: Ilir Jashari, Darjo Jashari, Servet Dauti (Maqedoni e Veriut), Luan Qorolli (Kosovë/Mbretëria e Bashkuar), si dhe shtetasit serbë Z.S dhe M.B. Ata akuzohen për kontrabandë me mallra akcize në formën e grupit të strukturuar kriminal dhe për vepra nga organizatë kriminale.
- Arrest në shtëpi për shtetasin N.G., i përfshirë në të njëjtat akuza.
- Arrest në burg për nëntë punonjës të doganës: I.H, K.G, I.C, A.T, M.N, G.T, G.S, E.SH, I.K, për kontrabandë të kryer nga zyrtarë të përfshirë në veprimtari doganore.
- Ndalim dalje nga shteti dhe detyrim paraqitje për 1 zyrtare dogane, M.D, si dhe për 18 punonjës të tjerë të doganave, përfshirë E.H, Y.K, B.R, I.Ç, I.M, A.S, Y.S, L.Ç, I.Z, F.Z, G.D, N.S, L.M, D.P, B.Z, A.N, V.G, SH.L dhe L.D.
Aktualisht, masa “arrest në burg” është zbatuar për 5 nga 15 të dyshuarit kryesorë, ndërsa për 15 nga 20 personat nën masën “detyrim paraqitje” dhe “ndalim dalje nga territori” është bërë ekzekutimi i plotë.
