BRUKSEL– Gjyqi për “Black Eagle” ka nisur në Belgjikë, e menjëherë kanë nisur zbulimet e para nga marrja në pyetje të të pandehurve. Media e huaja “La Libre” ka zbuluar se drejtuesit shqiptarë të një organizate kriminale prej 40 personash, shumë prej të cilëve shqiptarë, kishin në plan që të pastronin paratë e tyre duke…ndërtuar.
Të pandehurit janë takuar në Antile për të diskutuar për ndërtimin e kullave në Tiranë.
“Bashkëfajësia mund të gjendet edhe tek zyrtarët e lartë shqiptarë,”-bën me dije media që ka publikuar lajmin, por nuk i ka bërë me dije emrat e tyre.
Zyrtarët shqiptarë thuhet se morën pjesë në këtë takim për të lehtësuar marrjen e lejeve të ndërtimit. Por ky fakt u mohua të hënën nga Arbeni I., i cili megjithatë pranon se ka – ashtu si kushëriri i tij Artur S. (dy nga 3 kokat e grupit kriminal tashmë të arrestuar) – lidhje shumë të larta në Tiranë, por nuk e kanë pranuar pranuar takimin me zyrtarqt e pushtetit lokal. Pavarësisht pretendimeve të tyre, në dosje flitet se ata kanë bërë dorëzimin e një ore me vlerë 400 mijë euro në këmbim të këtyre lejeve.
Sipas të njëjtës media, personat në fjalë janë takuar me përfaqësues të pushtetit lokal, por nuk bëhen me dije emrat e personazheve dhe as pozicioni i tyre; po ashtu, nuk dihet a është marrë dakordësia dhe a janë ndërtuar këto kulla. Mesa duket Antilet ishin “epiqendra” e organizatës, e përzgjedhur nga Bashkim O., nga Kosova. Po ashtu, edhe dy liderat e tjerë të grupit, Artur S. dhe Arben I., kanë marrë pjesë në takime në Mallorca si dhe në Itali, gjatë të cilave u diskutua për investime në pasuri të paluajtshme të financuara nga paratë e drogës.
Të gjitha këto detaje janë zbuluar falë zbërthimit të “Sky ECC”.
Një tjetër media, “news.dayfr” zbuloi se nga grupi është identifikuar një tjetër “kokë”. Bëhet fjalë për një person që udhëton shumë në Dubai, Greqi apo dhe në Meksikë. Ai zotëron kompani në Qipro dhe Dubai dhe ka investuar në tregtinë e qymyrit. Gjithashtu ai zotëron një plantacion legal kanabisi në Greqi, duke marrë edhe subvencione nga qeveria.
Në telefonin e Indrit K., një prej të pandehurve kryesorë, shohim foto të pakove të kokainës, armëve, ekstazive, kartëmonedhave si dhe të dhëna për pagesat që duhen bërë në Amerikën Latine. Gjithashtu në telefonin e tij ka edhe dëshmi të transferimeve nga Brazili dhe Bolivia në Francë, Belgjikë dhe Angli. Përveç drogës, banda është aktive edhe në trafikun e armëve, makinave dhe prostitucionit.
Paratë që fitonin i investonin në pasuri të paluajtshme në Gjermani, Shqipëri, Itali dhe Spanjë, kryesisht në Mallorca.
