Një ngjarje shqetësuese është shënuar në një plazh në Selanik të Greqisë, e cila për fat të mirë përfundoi me një fund të lumtur për një fëmijë dhe familjen e tij.
Sipas mediave lokale, një djalë 4-vjeçar me origjinë nga Serbia, teksa po notonte në plazhin e Nea Vrasnës, pësoi një krizë epileptike. Si pasojë, ai gëlltiti ujë dhe përjetoi ndalje kardiake.
Për fat të mirë, në afërsi ndodhej një mjek gjithashtu me origjinë serbe, i cili ndërhyri menjëherë duke i dhënë ndihmën e parë dhe kryer reanimacionin kardiopulmonar (CPR). Falë ndërhyrjes së tij të shpejtë, fëmija arriti të rikuperohej pak para mbërritjes së ambulancës, e cila më pas i siguroi edhe oksigjenin e nevojshëm.
I mituri u transportua në Qendrën Shëndetësore të Nea Madytos dhe aktualisht ndodhet jashtë rrezikut për jetën.
